Sa mga katalagman ug emehensya, dili gyod maayo nga kita mag-panic. Mao kana’y makaingon nga mosamot na hinoong problema.
Sama niining nahitabo sa atong nasod karon diin daghan ang nangahadlok sa pagkatap sa novel cornonavirus o 2019 nCoV.
Daghan ang nagkabuang pagpangita og mga facemask, ang uban dili na ganahan manggawas ug ang uban nangahadlok na sa mga intsik tungod lagi sa kamatuoran nga ang virus nagsugod man sa Wuhan City sa Hubei province sa China.
Si Presidente Duterte kagabii, mipakalma sa mga tawo. Dili kono angayan nga ikahadlok ang virus nga gikan sa China, bisan sa duha ka confirmed cases ug ang usa namatay gyod.
“Let’s start with narratives by saying that everything is well in the country, that there’s nothing really to be extra scared of the coronavirus thing. It has affected a lot of countries, but you know in one or two [cases] in any country is not really that fearsome,” sigon sa atong presidente.
Gitataw sab sa presidente nga ang bugtong namatay sa nasod sa nCoV usa ka langyaw, busa dili husto nga mag hysterical ang mga tawo.
Kon naa may virus nga paspas nga mikatap, dili kini angayang iakahadlok.
“The response of the people from the initial reports of coronavirus was also hysterical when there was really no need for it actually. If there is really a virus going around, why do you have to be hysterical?” pasabot sa atong presidente.
Pero nganong nag-hysterical ang mga tawo?
Kana tungod ka yang kahimtang sa panglawas usa ka importante nga aspeto sa atong pagpuyo. Lisod nang magkasakit tungod kay kadaghanan kanato way budget para sa pagpa-ospital.
Lisod nang magkasakit tungod kay ang atong mga health facilities kuwang og mga tambal, kuwang og mga doctor.
Lisod nang magkasakit tungod kay dili ka makatrabaho, ug kon dili ka katrabaho, wa kay kwarta nga ikasuporta sa imong pamilya.
Taliwa sa daghang namatay sa nCoV didto sa China, kinsa may dili mahadlok?
Sayon ra’ng moingon ang gobiyerno nga paghunaw mo pirmi, pero daghan ganing dapit nga way agas. Unsa may ilang ipamnghunaw pirmi.
Pero ang dakong rason nganong daghan ang nahadlok ug naalarma, tungod kay nabantayan sa mga tawo nga hinay kaayo ang response sa gobiyerno sa pag-ulbo niining isyu sa coronavirus.
Pun-an pa sa pagdikidiki sa gobiyerno nga ipatuman ang travel ban sa China tungod lagi kay naikog ta sa maong nasod, bisan kon ang nahitaya mao na ang kahimtang sa panglawas sa mga Filipino, bisan kon ang ubang kanasuran mipatuman niini.
So, kinsa may mabasol?
The perceived slow response of our government can really make its people hysterical.
Daghang Salamat
