MAKITA ang malipayon nga panagway niining usa ka mag-uuma samtang nag-alsa sa dakong unod sa balanghoy sa Sitio Madbad, Barangay Gacat, Baybay City, Leyte.

Sigon ni Mr. Lorenzo Rebigan, school Principal sa Plaridel Elementary School sa Baybay, unang higayon nga nakakita siya og ingon niining gidak-on sa balanghoy.

Produkto kini sa cassava farm sa kanhi niya silingan sa barangay Gacat .

“Mr. Caintic the son of Vicente “Inting” & Ason Caintic harvested the 4 months old huge & heavy cassava from his Farm in Madbad, Gacat, Baybay City, Leyte!,”sigon ni Rebigan sa fb post.

Si Rebigan nga tigpaninaw sa dyLA, miingon nga motimbang og mga 30 kilos ang maong balanghoy.

“Karon pa ko kita ingun ani kadakoa,”dugang ni Rebigan.

Daghan kaayo og klase sa pagluto sa balanghoy. Human mapanitan, pwede dritsohon sa paglung-ag samtang butangan og tuno sa lubi ug asukar/kamay. Pwede sab himoong cassava cake ug puto.

Sa Bohol, lami kaayo kini gam-on nga binagol o binagow, diin kinahanglan nga bangguron kini, iptan sa punoan sa kahoy aron makuha ang duga (sa makahilo nga klase) ug dayon lutoon nga binagow.

(Photo ni Mr. Lorenzo Rebigan)