Gikan sa American president Lyndon B. Johnson, dili problema ang paghimo sa husto’ng mga buhat kon dili ang pagtino sa unsa may husto.
Makapasubo nga daghan sa atong mga opisyal sa gobiyerno, wa masayod sa unsay hustong buhaton niining hulga sa coronavirus sa atong dapit.
Bisag unsa nalang ang ilang gibuhatn ug sa ilang mga kapalpakan, ang katawhan mao ang alkanse.
Nag-atubang pa ang katawhan sa hulga sa virus, giusikan pa g’yod ang kuwarta natong mga magbubuhis.
Ang kagamhanan sa Siyudad sa Sugbo naputos sa daghang mga kontrobersiya ug kapalpakan human sa upat ka buwan natong pakigsangka sa coronavirus.
Wa pa kita modaug niining maong away tungod kay daw nagkayamukat ang liderato ni Cebu City Mayor Edgar Labella.
Gikan sa distribution sa mga relief goods nga dili tanan ang nakadawat, gawas nga gidudahan nga overpriced pa gyod ang pagpamalit niini, ngadto sa na-missing nga mga manok nga gi-donate sa usa ka kompaniya, sa nagyagaw nga distribution sa mga dagkong quarantine passes ug sa gidalidali pagtukod nga menteryo bisan wa pa makakuha og permit.
Karon miulbo na sab kining isyu sa mga tuob kits nga giingong gigastuhan og P2.5 milyones pesos alang sa mga COVID-19 patients.
Ang 1,000 ka tuob kits nga ang matag usa nagkantidad og P2,500, gi-distribute sa lainlaing mga barangay isolation centers aron kono makatabang sa mga COVID patients sa ilang recovery.
Pero wa g’yoy medical study nga nag-ingon nga makatabang kini sa mga nataptan sa virus.
Sigon sa mga naggawas nga reports, ang tuob kits gilangkuban lang sa mosunod electric water heater/steamer, usa ka steam gown, usa ka adult bath towel o tualya, duha ka hand towels o labakara, usa ka industrial plastic nga lingkuranan ug usa ka palanggana.
Apan ang atong tigpaminawan nga usa sa nataptan sa COVID, mipadala og hulagway sa ilang nadawat- usa ka electric water heater, tualya, 2 ka labakara, ug gamay nga palanggana.
Wala kanang giingong steam gown ug lingkuranan. Bisan kon naa pa, maglisod kita’g tuo nga makaabot sa maong kantidad nga P2,500 ang usa ka set sa tuob.
Ibutang nato nga tukma ang maong kantidad, apan ang laing pangutana, kinahanglan ba g’yod nga mamalit og tuob kits aron makatuob ang mga nataptan sa COVID.
Ang tubag niana, dili na kinahanglan. Tungod kay sayon ra man kaayo ang mga kagamitan sa tuob, naa nang daan sa atong mga panimalay nga mahimong dad-on ngadto sa mga isolation centers.
Si Cebu City Mayor Edgar Labella midiklarar nga wa siya’y kalibutan nini ug wa siya’y gipirmahan nga purchase order hinungdan nga iyang ipasusi kon unsay nahitabo nganong nakapalit ang Cebu City sa mga butang nga wa siya magsugo.
“I have no knowledge about it. It is P2.5 million and I have never authorized the purchase and received any purchase request. I’m going to look into it but I was told that it is the initiative of Councilor Guardo, so I will have to look into that,” matod sa mayor.
Sa report sa mantalaang The Freeman, giinsistir ni Guardo nga ang pagpalit gihimo sa executive department kay ang resolution sa konseho igo man lang nagduso sa pagtuon sa benepisyo sa tuob.
“As councilor, kutob ra man jud mi legislation – pagpasar ug resolution ug pagpanday ug balaud. As to the mode of acquisition, ilaha na na sa executive,” pasabot ni Guardo.
So, who is telling the truth?
Kon way kalibutan si mayor Labella, kinsa man diay sa executive department ang nagmaneho sa pagpamalit sa tuob kits?
Ayaw mi’g ingna nga dunay tagolilong nga mayor ang Cebu City?
Isip mayor sa dakbayan sa Sugbo, angayan unta siyang masayod sa tanang mga transactions nga gihimo sa Cebu City government, labi pa og maglambigit kini og dakong kantidad.
Siya susama sa kapitan sa usa ka barko. Dili mahimong mobiyahe ang iyang barko nga wa siyay kalibutan asa paingon. Kay kon malunod kini, siya ug wa nay lain pa ang manubag.
Daghang Salamat
