Walay pulos ang imong ipanulti kon makita sa mga tawo nga lahi ang imong gipangbuhat.
Sibo kaayo kini nga panultihon alang ni Cebu City Mayor Edgar Labella kinsa nagsige og panawagan nga ihiklin una ang politika niining panahon sa coronavirus pandemic.
Way sayop sa panawagan sa atong mayor ug gani, mao kini ang tukma nga buhaton nga ihiklin ang politika kay ang virus dili mamili og political color.
Walay political party ang COVID-19. Motakboy kini ni bisan kinsa, masakop man sa BOPK, Team Rama, PDP Laban o unsa pa nga grupo.
Busa angayang magtinabangay ang tanan aron makairog kita sa unahan ug makabangon na ang atong ekonomiya.
Si Mayor Labella na mismo ang misulti sa national media kagahapon. Business is hurting in Cebu City.
Sa wa pa ang pandemic, makakolekta ang Cebu City government og P10-million ngadto sa P12-million matag adlaw gikan sa real property ug business taxes samtang kon lean months naa sa P7-million matag adlaw.
Apan karon, naa nalang sa P100,000 ang makolekta sa Cebu City. Nagpakita kita kon unsa ka lisod ang negosyo karon, daghang kompaniya ang nanirado- ang uban temporaryo apan daghan ang “for good” na gyod.
Sa sulti pa sa insik, patay negosyo…patay sab mga tawo.
Taliwa niini, mihangyo si Labella sa tanan nga dili na magsige og panaway sa iyang gipanghimo, labi pa sa mga kontra niya sa politika.
Undangon na unta kono ang politika ug maghiusa kita sa pagtrabaho.
“You know whatever you do there will always be people who will question, especially the other side of the political fence. I’ve been appealing to them to stop political posturing, we are in the midst of this terrible crisis, this is an unforgiving virus, and everybody takes the risk, there are lives that have been lost. So let us stop our political posturing, I urged them let us work together,” sigon ni Labella sa usa ka interview nga napatik sa pamantalaan.
Iya kining reaksiyon tungod sa isyu sa mga quarantine passes nga daghan ang wa mahatagi ug daghan ang nangreklamo kay gipangsakmit man hinoon ang mga passes sa kapolisan kay nasaypan nga peke.
Ang PNP nagtuo nga ang basihanan ra gyod sa orihinal nga Q pass mao ang sinaw nga papel nga gigamit, apan nahutdan diay ang City Hall sa sinaw nga papel atol sa pag-imprinta mao nga ang dili sinaw nga bond paper maoy ilang gigamit.
Tiaw mo kana sa kahasol sa mga tawo tungod sa nahitabo ug sa kauwawan sa mga barangay officials nga maoy nag-apod-apod sa mga quarantine passes human nga gipasanginlan sila sa mga tawo nga naghatag og peke nga quarantine passes.
Bisan ang mga kapitan nga alyado ni Mayor Labella mipalag nganong ingnon nga peke ang mga passes nga gikan man kadto sa City Hall.
Makaingon ba ang atong mayor nga politika lang ang rason sa mga reklamo? Dili.
Ang City Hall maoy palpak tungod kay una, wa sila makahibawo pila gyod ang hustong gidaghanon sa mga households sa Cebu City mao nga nagkuwang. Makauuwaw kini tungod kay sila maoy dunay resources aron makakuha niini. Pero nagmantinir ra og 2016 record sa City Health Department sumala na sa gisulti mismo sa mayor.
Nanghambog sila nga QR-coded ang mga passes, unya nahulog ra diay’ng buwakbuwak ang mga giingon nilang QR codes kay dili man maoy himoong basihanan kon fake o dili ang quarantine pass kon dili ang kasinaw sa papel maoy gibasihan sa kapolisan.
Kagahapon, mikatap sa social media ang mga tawo sa Inayawan nga nagtapok tungod sa pagkuha nila sa mga hinabang bugas nga ang nanghatag mao ang Mayor”s Information and Liaison Office o MILO.
Si Kapitan Kirk Bryan Repollo, alyado sa BOPK, mireklamo niini tungod kay nalapas man ang social distancing atol sa pagpanghatag.
Sigon ni Mayor Labella mimando siya’g imbistigasyon nganong MILO ang nanghatag, unya mipasumbingay siya nga daghan sa mga kapitan nga sakop sa BOPK ang dili cooperative sa iyang administrasyon, tungod gihapon sa politika.
“Let us be reminded that the ordinance stipulates that the distribution should be done by barangay officials, not by MILO, but barangay officials,” matod ni Mayor Mayor Labella sa report sa CDN Digital.
Hinugay na niining imbistigasyon ug kining pagbasol dayon sa politika nga nakaingon sa kayagaw.
Kadtong mitapok ang mga senior citizens sa City hall, gipasanginlan sab ang politika kay nagduda sila nga ang pikas grupo maoy nangilad sa mga senior citizens.
Unya hain na man ang resulta sa ilang imbistigasyon niadto. Kinsa man ang mga politiko nga nagpaluyo?
Kining kaso sa distribution sa bugas, dili na mahitabong moabot sa mga kamot sa taga-MILO ang mga sinakong bugas kon way pagtugot sa labaw ug sa mga tawo niya sa City Hall.
Busa, mas maayong ang iyang imbistigahon ang iyang mga tawo o kaha ang iyang kaugalingon kay siya may nagmugna sa MILO.
Kon dunay bulilyaso ang mga nagdumala, naturalmente motiyabaw gyod na ang mga tawong apiktado. Dili kana politika.
Si Mayor Labella sama sa usa ka amahan ug ang mga molopyo maoy sama sa bata nga iyang gikugos. Wa niya mamaayo og kugos ang bata, tungod kay dunay ubang mga tawo nga nag-apil-apil sab sa pagkupot mao nga daw natuok ang liog niini.
Siyempre ang bata, motyabaw gyod.
Daghang Salamat
