Giila ang biktima nga si Argie Bukod Inao kinsa taga-Hinobaan, Negros Occidental.
Matod ni P/SSgt. Ressel Jabagat, ang desk officer sa Samboan Police Station, nga nakadawat sila’g tawag nga naglisod og ginhawa si Inao sulod sa San Sebastian National Highschool, ang tunghaan nga nahimong quarantine facility human nga wa na tugti nga makabyahe ang gatusan ka pasahero sa Bato, Samboan paingon sa Negros island.
Ang kaubang pasahero nga si Ferdinand Vergara miingon nga natulog sila sa dihang nabantayan nga naglisod siya og ginhawa.
Nanawag sila’g ambulansiya ug daling gidala sa Malabuyoc District Hospital si Inao apan gideklarar kini nga dead on arrival pinaagi ni Dr. Judy Ann Tubat.
Sigon sa kapulisan nga walay sintomas sa coronavirus disease 2019 kun COVID-19 si Inao ug ang giingon sa attending physician nga namatay kini tungod kay giatake sa kasingkasing.
Si Inao giingon nga usa sa mga na-stranded nga pasahero para sa Negros didto sa Bato, Samboan human nga gipatuman ang strict border control sa lalawigan sa Sugbo.
Basi sa police blotter, ang mga stranded passengers giisip nga persons under monitoring o PUM.
(Ang hulagway sa mga stranded passengers iya ni Royden Rusiana)
