Nagpasabot kini nga naa na sa 28 ang total COVID-19 cases sa Sugbo ug ang labing daghan naa sa Cebu City nga misaka sa 21. Sa rehiyon 7, 33 na ang total cases.
Si Dr. Jaime Bernadas, ang regional director sa Department of Health (DOH-7) nagkanayon nga usa ka 31-anyos, 57-anyos ug 54-anyos nga mga lalaki ang bag-ong kaso sa COVID-19 sa Sugbo.
Ang usa kanila taga Mandaue City kinsa mao ang pag-umangkon sa magtiayong doktor nga namatay tungod sa COVID-19.
Matod ni Bernadas nga gikan sa Manila ang 31-anyos kinsa unang gikonsiderar nga “highly suspected” bisan pa man kon wa kini nagpakita og sintomas.
Anaa na hinoon kini gi-isolate sa panimalay.
Ang laing positibo mao ang 57-anyos nga taga TTalamban, Dakbayan sa Sugbo.
Samtang ang ika-tulo mao ang 54-anyos nga professional kinsa taga Consolacion nga gikan ni-byahe sa gawas sa nasod.
Matod ni Mayor Joannes Alegado nga ang maong pasyente, gikan sa Middle East niadtong Marso 6 hangtod Marso 19.
Pag-abot sa Sugbo, naapil kini sa gi-require nga i-home quarantine subay sa gipatuman nga 14-day quarantine alang sa mga Pinoy nga gikan sa gawas sa nasod..
Ugmang adlawa, Abril 2 mahuman na unta ang quarantine period sa maong pasyente apan sa iyang ika-7 nga adlaw nga kwarantina, gihilantan kini.
“Wala ni siya respiratory symptoms nag fever lang…Mao to report dayon nato siya sa RESU, wala dayon makuhae og swab samples kay wala lage respiratory symptoms…but nawala sa to siya but nirecurr ang iyang fever, so I think gi-advisan na kay hypertensive man sad ang patient pud,” matod ni Alegado
Nibalik ang hilanat niini ug dayon nakuhaan og swab test kagahapon ug karong adlawa Abril 1,nigawas ang resulta nga positibo kini sa COVID-19.
Ang iyang asawa, anak, duha ka katabang nga stay-in ang gi-isolate na usab. Apil usab ang driver ang gipa-isolate
Apan gibutyag ni Alegado nga nag-contact trace sila sa nahimamat sa katabang ug drayber sanglit ang katabang nakapangompra pa kini pipila ka higayon ug ang drayber aduna usab higayon nga nasugoan.
Ang tanang nahimamat nila gikonsiderar na nga Persons Under Monitoring ug giabisohan nga mag quarantine.
Base bag-ong gitug-an ni Bernadas nga kaso sa COVID-19, anaa na sa 21 ang kaso sa Dakbayan sa Sugbo, 3 sa Probinsya sa Sugbo, 2 sa Dakbayan sa Mandaue ug 2 sa Lapulapu City.
May 4 ka kaso sa Negros Oriental ug 1 sa Bohol. Dunay 6 na sab nga patay sa rehiyon apil sa 4 sa Cebu City ug 2 sa Negros Oriental.
