Kini maoy paghulagway sa labing dakong kahugpungan sa mga mamumuo sa nasod, Associated Labor Unions- Trade Union Congress of the Philippines (ALU-TUCP), sa pagpatuman sa Social Security System (SSS) ug Philippine Health Insurance Corporation (Philhealth) sugod karong buwana sa umento sa contributions sa ilang mga sakop.
SI Alan Tanjusay, tigpamaba sa ALU-TUCP, miingon sa interview sa radio dyLA sa Cebu City, nga dili karon ang tukmang panahon aron ipatuman ang umento tungod kay naglisod pa ang mga mamumuo ug bisan ang mga negosyante, nga maoy magtunga sa pagbayad sa contributions.
Ang mga negosyante, sigon ni Tanjusay, wa pa makabangon tungod sa grabeng alkanse taliwa sa pandemya.
Mao usab ang mga trabahante diin 5-milyones ang nawad-an og trabaho tungod sa crisis, ug naa pa’y 10-milyones nga underemployed – kadtong mga on-call nga mga trabahante o kadtong patrabahoon lang og pipila ka adlaw sulod sa usa ka semana tungod gihapon sa pandemya.
“Nagulat tayo kasi tinuloy nila kahit on-going pa ang economic crisis and almost all of the establishments are affected by this crisis,”sigon ni Tanjusay.
Gawas niana, matod ni Tanjusay dili kini tukma ug wa masubay sa proseso kay angayan unta nga mihimo og social dialogue ang SSS ug Philhealth.
Matod ni Tanjusay nga kaniadto, gikonsulta gyod ang ALU ug ang TUCP sa mga programa ug unsa may ipatuman sa SSS ug Philhealth pero walay konsultasyon nga nahitabo karon.
“They have to consider the situation of the members, they have to consult the owners of the money that they are managing,” dugang ni Tanjusay.
Matod ni Tanjusay nga sayop sab nga kobrahan og umento ang mga sakop sa Philhealth nga wa pa gani mahibaw-i kon naa pa ba o wala na ang corruption sa ahensya.
Gani, wa pay nasilutan o napriso man lang taliwa sa giingong lapad nga corruption sa Philhealth.
Niini, mopadala og communication ang ALU TUCP ngadto ni Presidente Duterte aron manduan ang duha ka ahensya nga dili idayon ang umento.
“We are calling the attention of the President because the president can defer or ask Philhealth and SSS to stop temporarily the increase,”sigon ni Tanjusay sa dyLA Cebu interview.
