Si Alan Tanjusay, tigpamaba sa ALU-TUCP, miingon nga ubay-ubay gyod nga reklamo ang nadawat sa buhatan sa ALU gikan sa mga trabahante nga wa mahatagi sa ilang 13th month pay niadtong Disyembre, 2020.
Ubos sa balaod, ang 13th month pay mandatory kini nga ihatag sa management ngadto sa ilang mga trabahante sa dili pa molapas ang Disyembre 24.
Matod ni Tanjusay, bisan ang mga non-unionized or non-organized workers apil sa midangop ngadto sa ALU.
“ALU is helping them, ni-refer namin sila sa DOLE,”sigon ni Tanjusay.
Matod ni Tanjusay nga mas paspas ang action sa DOLE kon idritso pag-file ang reklamo sa DOLE.
“So, file the complaint directly to DOLE,”pasabot ni Tanjusay alang niadtong wa gyod mahatagi sa 13th month pay.
Usa sa nagpatabang sa ALU mao ang usa ka company driver kinsa mityabaw kay katunga ra sa iyang 13th month pay ang gihatag.
Ang hinungdan tungod kay atol sa nagdangat ang Pasko, siya maoy gipahatod sa mga pinaskuhan apan nadisgrasya kini.
Ang kompaniya giingong midemenda sa empleyado nga siya maoy moabaga sa pagpaayo sa danyos sa sakyanan, busa katunga lang una ang ihatag sa 13th month pay.
Matod ni Tanjusay nga illegal gyod kini tungod kay lahi ang isyu sa disgrasya ug lahi usab ang 13th month pay nga obligasyon gyod nga ihatag sa management.
