Ang tanang whale shark watching activities sa lalawigan sa Bohol gipahunong ni Bohol Governor Erico Aris Aumentado.

Sa iyang executive order nga gipirmahan sa adlawng Lunes, Pebrero 3, 2025, si Aumentado mimando sa pagpaundang sa tanang illegal whale shark interaction activities.

“Operating in violation of applicable laws, memoranda, circulars, convention agreements, or ordinances are prohibited and must cease operations,”sigon sa iyang kamanduan.

Gipahimug-atan sa order ang pagbadlong sa mga tour operators sa mga lungsod sa Lila, Albuquerque ug Dauis nga molawog og pagkaon sa mga butanding aron mopaduol kini sa mga turista.

Si Aumentado mipasabot nga ang maong kalihukan walay pagtugot o permit gikan sa Department of Environment and Natural Resources ug ubang ahensya.

Nakalapas sab kini sa provincial ordinance nga gipirmahan niadtong 2020 diin gidili ang feeding o pagpakaon sa mga butanding o whale sharks ug ubang mga mammals sa vicinity sa kadagatan sa Bohol.

“Okay ang whale shark watching but ang feeding, sa surrounding nga water, may foul odor especially to Panglao – ang sentro ng ating turismo,” matod ni Aumentado ngadto sa mga tigbalita.

Nabalaka sab si Aumentado nga ang whale shark activities makakompromiso sa turismo sa probinsya ug sa kalidad sa tubig sa kabaybayanon sa Bohol.

Si Aumentado mipasalig sa mga operators nga kon makakuha sila og permits gikan sa mga tukmang ahensya sa gobiyerno, iyang tugtan ang kalihukan apan adto ra sa kadagatan sa Lila, Albuquerque ug Dauis.

Giklaro sab niya nga kon mahitabo man kana, wa gihapoy itugot nga feeding sa mga migratory mammals.

“Atong ipa-comply, basta no feeding, walang problema,” pasabot ni Aumentado.

“If you feed them, they will change their direction and it will destroy their migratory path,” dugang sa gobernador sa Bohol.

Ang mga whale shark feeding activities gihimo sa kadagatan sa Albuquerque-Loay-Loboc Protected Landscape and Seascape ingon man sa Panglao Island Protected Seascape.

Kining dapita giingong gi-regulate sa National Integrated Protection Areas System.

Si Governor Aumentado wa mabalaka nga momenos ang mga turista sa Bohol human niya ipaundang ang whale shark watching activities kay daghan pa mang mga popular attractions sa lalawigan.

Bisan kon ang iyang executive order moepekto unta dayon, apan gihatagan ni Aumentado ang mga affected workers and business owners hangtod sa Pebrero 7 aron undangon ang ilang operasyon.

“The DOLE (Department of Labor and Employment) is here to help our displaced workers,” pasalig ni Aumentado.

Gimando sa gobernador ngadto sa Philippine National Police Maritime Group, Department of Environment and Natural Resources, Environmental Management Bureau, Philippine Coast Guard, Bureau of Fisheries and Aquatic Resources, ug Coastal Law Enforcement Council ang pagpatuman sa iyanhg kamanduan.

Sa mga mayor nga dili motuman sa iyang mando, si Aumentado miingon nga iya kining idangop sa Department of the Interior and Local Government.

Si Aumentado nagplano sab sa pag-tap sa mga job order employees sa Kapitolyo aron mopatuman sa iyang order.

“I am just protecting our province,” Dugang ni Aumentado.

Ang Bohol Province gidiklarar nga UNESCO Geopark tungod sa mga natural sites sama sa Chocolate Hills.

Photos: Courtesy of IWON Lila Whale Shark Watching fb page