Si Cebu City Vice Mayor Michael Rama miingon nga ang Sinulog dance showdown controllable ra sanglit maisip kini nga Sinulog bubble sa SRP ug way mga tawong tugtan nga motan-aw kay ipakita ra kini online.
Sigon ni Rama nga lahi ra kaayo kini sa kalihukan sa misa de gallo nga gihimo sa 9 ka adlaw ug nga daghan ang milapas sa physical distancing.
Matod ni Rama nga ilaha gihapon ipadayon ang ilahang mga nasugdan alang sa Sinulog 2021 bisan paman sa pagsupak sa PRO-7 nga ipahigayon kini karong tuiga.
“Cancelling Sinulog is like cancelling culture and history,”matod sa Bise-Mayor.
Sigon ni Rama nga ilaha gyud giplanuhan kini pag-ayo nga di makalapas sa minimum health standard.
Iyaha usab gisalikway ang pasangil nga wala sila mocoordinate sa Emergency Operation Center (EOC) nga gipangulohan ni City Councilor Joel Garganera ug sa kapulisan may labot sa ilahang mga plano.
“We have been inviting the EOC to our executive committee meetings. But not even one representative from them attended,” matod ni Rama.
Dugang ni Rama, kinsa maoy gitahasan ni Mayor Edgardo Labella nga mangulo sa mga kalihukan sa Sinulog karong tuiga, nga andam sila nga mopresentar sa ilahang plano alang sa cultural events sa Sinulog ngadto sa RIATF.
