Basi sa imbistigasyon sa kapulisan sa San Fernando ubos sa hepe nga si PMAJ Peter L Naboye Jr., nahibaw-an sa dyLA nga ang namatay mao ang nagmaneho sa motorsiklo nga si Neil Bryan L. Solayao, 25-anyos ulitawo, taga Purok Sampaguita, barangay Tinubdan sa maong lungsod.
Ang mga samaran mao ang iyang mga pag-umangkon nga miangkas niya: brothers Alvin Rhey L. Solayao, 19-anyos ug Jay L. Solayao, 17-anyos, kinsa mga estudyante sa Balud National High School.
Matod sa PMSg Paul Baclay, traffic investigator, gihatod ni Neil Bryan ang iyang mga psg-umangkon sakay sa motorsiklo nga walay plaka ug dokumento paingon sa tunghaan.
Apan pag-abot sa blind curve diin giingong kusogkusog ang dagan sa motorsiklo, mi-overtake kini og multicab apan nabangga hinoon sa gikusugat nga Isuzu Truck (may kargang mga manok nga bantres).
Ang truck nga gimaneho ni Felix C. Taborada, 37-anyos, ulitawo nga taga Purok Tikarol, barangay Balud, giingong mikawat og dyutay sa pikas lane kay milikay sa naka-park nga sakyanan.
Kini maoy hinungdan nga maayong pagkabangga sa motorsiklo, ug nasulod pa sa ilawom ang driver nga si Neil Bryan.
Si Neil Bryan gidiklarar nga dead on the spot sa RHU Doktor nga si Maria Jessica Lean Triste, samtang ang mga managsuon gidala sa mga responders sa San Fernando MDRRMO sa Carcar Provincial Hospital.
Sigon ni Baclay, ang 19-anyos ang critical ug ang kamanghuran maoy naa sa stable condition.
Gawas nga ang motorsiklo way mga dokumento, matod ni Baclay wala sab mag-helmet ang mga biktima. (Report ni Dario Gil)
📷San Fernando police station
