Matod ni Konsehal Tumulak, kinsa maoy gitahasan ni Mayor Edgardo Labella nga mo-oversee sa vaccination sites, nga idugang karon ang University of Cebu Senior High School Building sa Brgy Sambag I (atbang sa E-Mall).
Tungod niini, mamahimo nang upat ang vaccination sites sa dakbayan kun mabuksan na kini.
Apan sigon ni Tumulak nga sa pagkakaron wala pa’y ensaktong petsa kun kanus-a magamit ang UC Sr High School building human nga gipaabot pa ang go signal gikan sa Department of Health ug sa Cebu City Health Department kun CHD.
Samtang gibutyag usab sa kadagkuan sa CHD nga di pa usab sila makasulti kun kanus-a mabuksan ang maong ikaupat nga vaccination site sa Cebu City.
Sa pakighinabi sa dyLA, giangkon ni Dr. Jefrey Ibones, ang pangu sa CHD, nga kuwang pa ang ilang mga staff sama sa doctor ug mga nurses nga mobakuna sa pagkakaron maong di pa nila madali-dali nga mabuksan ang ikaupat nga vaccination site.
Sigon ni Dr. Ibones nga gitan-aw karon nila ang posibleng pagpangayo’g tabang sa mga pribadong tambalanan dinhi sa Sugbo sama sa St. Vincent Hospital ug Perpetual Succour Hospital human nga aktibo usab ang maong mga ospital nga mo-boluntaryo sa vaccination roll-out sa lokal nga kagamhanan.
Dugang ni Ibones nga kun aduna na sila’y mga staff nga makuha posible sunod semana o labing dugay duha ka semana sa pagkakaron mabuksan ug magamit na ang vaccination site sa UC Sr High building sa Brgy Sambag I.
Ang kasamtangang 3 ka vaccination sites sa Cebu City mao ang SM Seaside City, Robinsons Galleria ug UC Banilad.
