Nangayo og P430 matag adlaw nga umento sa sweldo sa mga trabahante sa Central Visayas ang Trade Union Congress of the Philippines (TUCP) ngadto sa Regional Tripartite Wages and Productivity Board sa Central Visayas (RTWPB-7).
Matod ni TUCP Representative Raymond Democrito Mendoza nga duha na ka tuig ang nilabay sukad nga gitugot sa RTWPB-7 ang P18/day nga umento sa sweldo sa mga trabahante sa rehiyon niadtong 2020 ug sulod sa maong katuigan daghan na ang nahitabo.
“Sa 2020 wala ta ka file, sa 2021 wala ta ka file kay pandemya. Karon sa 2022 ilabina sa pagsaka sa basic commodities ug sa oil murag niabot na gyud ang panahon nga patas-an na nato ang sweldo,” matod ni Mendoza.
Matod niya nga ang P404 nga kasamtangang daily wage “ubos pa kaayo sa panginahanglan” sa pamilya.
“Ang hangyo sa TUCP tagae intawon og hustong sweldo, ayaw sad tawon na nga ubos sa poverty threshold,” matod ni Mendoza.
Kagahapon, Marso 21, 2022 pormal nga giduso sa TUCP ang petition niini ngadto sa RTWPB-7.
Kon aprobahan sa RTWPB-7 ang petition sa TUCP, gikan sa P404, mahimo na nga P834 matag adlaw ang sweldo sa mga trabahante sa Central Visayas.
Ang lakang sa TUCP pagpasaka sa sweldo sa mga trabahante gihimo human sa pagsaka sa presyo sa lana sa niaging mga semana nunot sa padayon nga gubat sa Russia ug Ukraine.
Apan matod ni Mendoza nga dili ra kini maoy ilang rason.
“Let me also be clear on our fight, of decent wages. Wage hike was needed long before the Ukraine-Russia was and the sksyrocketing oil prices that followed. The possible oil price rollback this coming week, although we would certainly welcome it, does not mean rolling back our wage petition. Our minimum wage earners and their families have already fallen below the poverty level even before the ongoing conflict and its aftermath. The fact that our minimum wage earners have become the newly poor is a blatant injustice that must be seriously and urgently addressed by the government,” matod ni Mendoza.
