Ang House of Representatives mi-aprobar sa third and final reading sa balaodnon nga nagtinguha pagpalig-on sa security of tenure sa mga trabahante sa pribadong sector ug magtapos sa labor-only contracting practice.
Ang mga Kongresista mibotar 204-7 uban sa 3 ka abstentions niadtong miaging semana aron aprobahan ang House Bill 7036 or the Security of Tenure Act, diin gi-require ang mga job contractors nga mokuha og permit gikan sa Department of Labor and Employment.
Alang ni Trade Union Congress of the Philippines (TUCP) President ug partylist Representative Raymond Democrito Mendoza, alkanse kaayo ang mga trabahante sa maong balaodnon.
“Ang problema mao ang labor-only contracting which is illegal, dili nalang ta magbalikbalik pa ana,”sigon ni Mendoza sa dyLA interview.
Matod ni Mendoza nga ang gipasar karon sa ubos-balay-balauranan mao ang gihulagway niyang “watered-down version.”
“Ato nang gikasubo , mangayo nalang ta og…. sa tagalog pa…paumanhin. Ang among gusto nga kadto untang gipasa sa 17th Congress mao unta to’y sundon,”dugang ni Mendoza.
Ang dag-anan nalang sa mga mamumuo mao ang Senado, kon ugaling usbon kini.
Mipasalig si Mendoza nga pakig-estoryahan niya si Senador Joel Villanueva, ang chair sa Senate Labor Committee, aron pasabton sa mga provision nga di gyod makaayo sa mga trabahante.
Sa buwag nga pamahayag, ang TUCP miingon nga kining maong balaodnon maoy mag-legitimize sa contractualization.
“The bill does not meet the President’s promise to end contractualization. Congress missed a historic chance to correct the decades-long injustice to workers,” sigon sa TUCP sa statement.
Giawhag sa TUCP ang congressional bicameral conference committee nga korihi-an ang mga sayop niining maong bill.
“Without interventions in the Senate, the exploitation of workers will continue,” dugang sa TUCP.
