PATAY dihadiha ang jewelry shop owner Joseph Canonigo, 58 anyos, taga C. Padilla St., Mambaling, Cebu City human gipusil sa stop light sa eskina Colon St. ug Panganiban St., barangay Pahina Central sa Siyudad sa Sugbo mga pasado alas 5 kaganihang hapon.

Kini ang gibutyag ni PSSg Kitz Daryl Palaña, ang Investigator on Case (IOC) sa Carbon PS 5 sa pakighinabi sa dyLA.

Matod ni Palaña, si Canonigo kinsa buwag sa asawa ug may kapuyo na, maoy nanag-iya sa jewelry repair shop nga naa mahimutang sa COLONADE mall sa dalan Colon.

Matod ni Palaña nga ang biktima nag motorsiklo paingon Pasil apan pag-abot sa stop light sa maong eskina Colon ug Panganiban, mihunong kini. Adunay mitapad nga laing nagmotorsiklo ug ang biktima gipusil tumong sa ulo ug ubang bahin sa iyang lawas.

Ang biktima dead on the spot samtang ang mga gunmen daling misibat sa dapit.

Matod ni Palaña nga sa pagkakaron, wa pa’y matumbok nga suspek ug kon unsa ang motibo kay ang kapuyo niini ug ang mga igsuon, wa may nailhan nga gikabangi ni Canonigo.

📷 Carbon PS 5