Gilubong karong hapon ang 4 ka sakop sa pamilya nga namatay sa sunog sa ilang balay sa sitio Walog, Balabagon, Moalboal, Cebu.
Ang upat gilubong ala una karong hapon sa Tunga Public Cemetery sa Moalboal, sigon sa silingan nga si Jesseca Inihao.
Ang namatay sila si Jonathan Masuela, 38; asawa nga si Rose, 38; mga anak nga si Daireen, 14 ug Jethro, 12.
Nakalingkawas ang 16-anyos nga si Juvy John Masuela, kinsa nag-birthday karong adlawa.
Naluwas sab ang kamanghuran nga si Jhelsie, 9, kay didto higda sa balay sa apuhan sa duol ra sab sa ila.
Sa online interview ni Inihao, nahibaw-an nga si Juvy John nakagawas sa bintana sa iyang kwarto kay iyang giguba ang jalousie.
Ang mga namatay nag-uban og katulog sa usa ka kwarto.
Gidudahan sa mga silingan nga mibuto nga charger maoy nakaingon sa sunog.
“Charger daw na ni boto pero wala paman gyo’y klaro unsa gyuy nahitabo,”sigon ni Inihao.
Ang kayo posibleng nagsugod sa sala dapit sa pultahan sa kwarto sa magtiayon maong wa na sila makagawas.
Ang naluwas nga si Juvy John wala ra maunsa, apan iyang gisaulog iyang birthday karong adlawa kauban sa iyang manghod nga si Jhelsie pinaagi sa paglubong sa ilang mga ginikanan ug igsuon.
Ang 2 ka mga bata ubos sa pag-atiman na sa ilang apuhan.
Giklaro sab ni Inihao nga sila si Juvy John, Jhelsie ug ang namatay nga si Jethro maoy mga anak ni Jonathan sa una niyang kapuyo; samtang kadto si Dyren anak sab ni Rose sa una niyang gikarelasyon.
Nagka-ipon sila si Jonathan ug Rose nga may tagsa tagsa na ka mga anak.
(Photo gikan sa silingan pinaagi ni Jesseca Inihao)
