Si Cleevan “Little Merman” Alegres, 25 anyos nga open-water swimmer, maoy labing unang Oponganon nga naka-circumnavigate sa tibuok Isla sa Mactan pinaagi sa paglangoy.
Natapos ni Alegres ang paglangoy tuyok sa Mactan Island sulod sa 17 oras, 37 minutos ug 35 segundos. Miabot og 44 kilometros ang nalangoy ni Alegres nga iyang gisugdan alas 5 sa hapon kagahapon (Abril 25) ug nahuman alas 10:37 karong buntag (Abril 26).
Nagsugod si Alegres sa paglangoy sa kadagatan sa Barangay Punta Engaño ug naabot siya sa Maribago area alas 10 sa gabii ug pag-abot sa tungang gabii, nagkaduol na siya sa roro port sa Cordova town.
Mga alas 7am kaganihang buntag, nakompleto niya ang 32 kilometros nga paglangoy dapit sa vicinity Nuestra Señora Birhen de Regla Parish sa barangay Poblacion.
Si Lapu-Lapu City Mayor Junard “Ahong” Chan mao gyod ang mitagbo ni Alegres sa dihang mihaw-as kini sa dagat didto sa Liberty Shrine.
“Dako ang kalipay nga akong gibati sa kalampusan nga naangkon ni Cleevan. Usa ka dakong garbo sa atong dakbayan ug kanatong mga Oponganon ang talagsaon nga panghitabo nga atong nasaksihan. Dili masukod ang kadako sa pasidungog nga nahatag ni Cleevan sa atong bayani nga si Datu Lapulapu. Usa gayud kini sa mga highlight sa atong pagsaulog sa ika-500 ka tuig nga kasumaran sa Kadaugan sa Mactan. Gawas niini, napaabot usab niya ang mensahe ngadto sa katawhan kalabot sa pagprotehir sa atong marine life,”sigon ni Chan sa iyang fb page.
Matod ni Chan nga gihatagan si Alegres sa pasidungog ug P100,000 cash incentive pinaagi sab sa resolution sa konseho sa Dakbayan sa Lapu-Lapu.
Aduna usab siyay nadawat nga P42,000 cash gikan sa Mactan Electric Company, Inc. Ang paglangoy ni Alegres gitumong aron mas madako ang pagpakabana sa katawhan sa pagpanalipod sa marine life.
(Photo: courtesy of Ahong Chan fb page)
