Ang nadakpan sa mga sakop sa Talisay City Police Station mao si Guendolyn Tavera Luwage, 22-anyos, atol sa anti-drug operation ala 1:25 a.m. kaganihang kaadlawon (February 19) diin ang target mao ang iyang amahan.
Ang amahan nga si Francisco Luwage, kanhi chief tanod sa susamang barangay, nadakpan sab sa susamang operasyon.
Sigon sa report ni P/Major Gerard Ace Pelare, hepe sa kapolisan sa Dakbayan sa Talisay, si Guendolyn nakuhaan og shabu nga mitimbang og .09 nga nagkantidad og P612.00 samtang si Francisco nakuhaan og 12.21grams sa shabu nga nagkantidad og 69,428.00.
Sa interview sa mga tigbalita, si Pelare miingon nga nasayran nila nga si Guendolyn maoy tigdawat sa halin sa drugas, busa iapil gyod nila kini sa pagpasaka og kaso.
Dunay 14 pa ka mga drug suspects ang nadakpan sa pagpatuman og search warrants ingon man buybust operations diin nasakmit ang shabu nga dunay kinatibuk-ang kantidad P266,150.00.
Apan dunay usa sa mga drug suspects ang giingong misukol ug napatay sa kapolisan.
Sa dihang gipatuman ang search warrant batok ni Gilbert Campo sa sitio Mangga, Lawaan 3, nahitabo ang pinusilay ug napatay si Campo.
Ang ubang targets sa lainlaing operasyon mao sila si Kirby Tavera Basillote, Saturnino Kendall Basillote, Newton Jan Cabras Toritoy, Remedios Regodos Rico ug mga kaubanan.
Gi-serve sab unta ang search warrant batok sa usa ka Anna Fe Abrenica apan nakasibat kini. Duha niya ka kauban ang nadakpan ug nakuhaaan og 10.09 grams sa shabu.
Sa tanang 16 nga nadakpan, 6 nila ang mga high value target. Gawas sa Talisay City Police Station, miabag sab ang Regional Intelligence Division o RID 7, CPPO Provincial Intellligence Branch o PIB ug Provincial Mobile Force Company o PMFC.
