Matod ni Police Brigadier General Albert Ignatius Ferro, ang director sa PRO-7, nga ila karong gitan-aw nga aduna pa’y mga kauban ang mga nasikop nga duha ka Chinese nga gitumbok nga maoy nangidnap sa tulo ka mga batan-ong Chinese nga kauban ra nila sa trabaho.
Pasado alas 2 a.m. kaganihang kaadlawon, nasikop sa Lapu-Lapu City Police Office (LLCPO) uban sa Anti Kidnapping Group (AKG) Visayas ang duha ka Chinese nationals nga sila si A Gui ug Xiao Fan human nga giingong ilang gi-kidnap ang 3 ka mga kauban.
Wala giila sa mga awtoridad o wala hinganli ang tulo ka biktima tungod usab sa seguridad nila.
Apan base sa ID nga nakuha sa mga awtoridad, ang mga suspetsado ug biktima mga Philippine Offshore Gaming Operators (POGOw) orkers sa dakbayan sa Lapu-Lapu.
Sa press conference kaganinang buntag, gibutyag ni General Ferro nga mismo ang Chinese Consulate ang ni-contak sa LLCPO kabahin sa pagpangidnap sa tulo ka batan-ong Chinese sa Dakbayan sa Lapu Lapu ug nagpatabang sila sa mga awtoridad sa pagsikop sa mga suspetsado.
Ang pamilya sa mga biktima ang nangayo’g tabang sa Chinese Consulate human gipangayo-an og dakong ransom sa mga kidnappers ug ang Consulate office na ang nakig-coordinate sa kapulisan dinhi sa Sugbo.
Matod ni Col. Dexter Rellora, ang hepe sa AKG-Visayas, nga kapin sa 170 Chinese yuan o moabot ngadto sa kapin P1.2 milyones ang gipangayo nga ransom money sa mga suspetsado.
Daling gilusad sa kapulisan ang operation diin ilang na-trace ang hideout sa mga suspetsadong Chinese nga apartment sa usa ka subdivision sa Barangay rMactan sa Lapu-Lapu City.
Sigon ni Col. Rellora nga nakaposas pa ang tulo ka Chinese victims atol rescue operation.
Dugang ni Rellora nga dako ang posibilidad nga gi-torture ang mga biktima tungod kay aduna sila’y nakitang daghang hematoma o mga bun-og sa lawas sa usa ka biktima samtang ubay-ubay nga samad usab sa laing duha.
Nakuha gikan sa posisyon sa mga suspetsado nga si A Gui ug Xiao Fan ang mga stun gun, taser, dako nga bolo, mga cellular phones, ug laptop.
Gibutyag ni Rellora nga nagsilbi lang nga gwardiya si A Gui ug Xiao Fan ug posible pa’ng adunay mastermind sa maong kidnapping case.
Tungod niini, gimando karon ni General Ferro ang pagpalawom pa sa imbestigasyon ilabi na nga kun aduna bay koneksiyon ang maong grupo sa mga grupo usab sa mga Chinese nga nangidnap og mga Chinese sa kaulohan.
