NAKABSAN sab sa kinabuhi ang 19-anyos nga grade 12 student sa Balud National High School sa San Fernando, Cebu human mapasok sa ilawom sa truck ang ilang gisakyang motorsiklo kauban sa iyang manghod ug gimaneho sa ilang uyoan alas 8:30am karong adlawa sa South Poblacion, San Fernando.

Sigon ni Pearl Ayawan, kinsa silingan sa mga biktima sa barangay Tinubdan, namatay didto sa hospital si Alvin Rhey Solayao Llorinti a.k.a Lorince.

Gikompirnar sab kini sa ubang mga silingan ug sa iyang fb account nga ang iyang mga higala nipadangat sa pahasubo.

Unang gidiklarar nga patay on the spot ang 25-anyos nga uyoan nga si Neil Bryan L. Solayao, taga Purok Sampaguita, Tinubdan, kinsa maoy nagmaneho sa motorsiklo.

Ang manghod ni Alvin nga si AE Jay, 17, luwas ang kahimtang tua sa tambalanan.

Matod ni Ayawan, posibleng nagpakusog ang uyoan kay aron makaabot sa National Achievement Test o NAT ang grade 12 nga pag-umangkon.

Kamagwangan si Alvin sa 5 ka magsuon. Patay na ang ilang amahan 2 ka tuig ang milabay kay giatake pagdayon og sugod sa pandemic. Ang ilang inahan nagtrabaho sa usa ka carenderia sa Cebu City.

Matod ni Ayawan, buotan nga bata kini si Alvin.

“Looy gyud mismo kami wala mi magtoo kay kana bataa buotan gyud nang alvin sir wala na nah sila papa gud sya kinamagulangan. Sya man unta na tig drive sa motor daw ug paingon school kauban iya mga manghod kana nga time iya uyuan ang ga drive,”sigon ni Ayawan sa online interview da dyLA.

Sigon sa imbistigasyon sa kapolisan, ang motorsiklo mi-overtake sa multicab sa blind curve nga kalsada, apan miguho ang Isuzu Truck nga mikawat og lane kay naglikay sa naka-park nga sakyanan. Mao nga mibangga ang motorsiklo ug napasok ilawom sa truck ang driver samtang nangalagpot ang 2 ka pag-umangkon.

📷 gikan sa fb account ni Alvin Rhey Solayao Llorinti