ANG mga kompaniya sa lana mipahibawo sa laing dakong umento sa presyo sa gasolina karong adlawa, Martes.
Kini na maoy ika-napulo ka sagonson nga semana nga mosaka ang presyo sa gasolina. Hinoon mikunhod sab ang presyo sa diesel ug kerosene.
Sa buwag nga mga advisories, ang Chevron Philippines Inc. (Caltex), Pilipinas Shell Petroleum Corp., ug Seaoil Philippines Inc. mi-anunsyo nga mosaka ang presyo sa gasolina bali’g P1.15 matag litro.
Dunay rollback sa diesel bali’g .35 sentimos matag litro ug kerosene bali’g .30 sentimos matag litro.
Ang Cleanfuel ug Petro Gazz mopatuman sab niining maong kausaban sa presyo, apan way apil sa kerosene nga wa sila.
Ang oil price adjustment mi-epekto alas 6 sa buntag karon, November 2, sa tanang oil firms, gawas lang sa Cleanfuel nga moepekto 4:01 p.m., ug Caltex sa 12:01 a.m. kaganihang tungang gabii.
Ang latest data sa Department of Energy (DOE) nagpakita nga ang year-to-date adjustments anaa sa net increase nga P20.80 per liter sa gasolina, P18.45 per liter sa diesel, ug P16.04 per liter sa kerosene.
File 📷
