POSIBLENG pabayron og multa o kaha mabilanggo gyod ang taga-Plantation Bay Resort and Spa sa Lapulapu City kon mamatud-an nga nakalapas sa balaod tungod sa giingong diskriminasyon ngadto sa usa ka bata nga dunay autism.

Ang Department of Tourism (DOT) mi-imbistigar na sa pasangil sa usa ka inahan nga ang iyang 6-anyos nga anak nga may ‘special needs’ gikasab-an sa lifeguards tungod sa pagsyagit sa bata.

Sa usa ka press statement karong adlawa, December 9, sigon sa DOT nga gisugdan na ang imbistigasyon.

Kon masuta nga sad-an, dunay ipahamtang nga ‘proper administrative sanctions’ ngadto sa sikat nga resort.

Ang discrimination against persons with disabilities maisip nga illegal ubos sa Republic Act No. 7277, or the Magna Carta for Persons with Disabilities.

Kon masuta nga sad-an, ang usa ka tawo o kompaniya mamultahan gikan sa P50,000 ngadto sa P100,000, depende sa gidaghanon sa kalapasan ug mahimong mapriso gikan sa 6 ka buwan hangtod 6 ka tuig.

Ang tourism department miingon nga makigdugtong sila sa Department of Justice (DOJ) sa pag-imbistigar sa resort.

Nasayran nga gisaway pag-ayo sa mga netizens ang resort tungod sa pagpanginsulto jga gihimo sa resort major shareholder Manny Gonzalez ngadto sa inahan nga si Mai Pages, kinsa mibulgar sa ilang di maayong kasinatian pag-estar sa resort pinaagi sa Facebook ug sa travel site TripAdvisor, diin gihatagan niya ang resort og one-star rating.

Apan si Gonzalez mitubag ug niingon nga namakak si Pages kay ang pagsyagit dili symptom sa autism ug mitambag pa kini nga ipa-google ang autism.

Human sa backlash sa mga netizens, nangayo’g pasaylo si Gonzalez kinsa miingon nga ang kaluwasan sa mga batang guests mas importante kaysa garbo sa inahan.

Misamot ang kasuko sa mga netizens, kinsa nanawagan nga iboycott ang Plantation Bay.

(Photo: Plantation Bay fb page)