DUHA ka adlaw human masunog ang ilang balay, nakit-an na karong adlawa (Miyerkules) ang patay’ng lawas sa apo ni anhing retired Judge Gerardo Gestopa ug Louella Gestopa.

Sigon sa suod sa pamilyang Gestopa, ang nakakita sa patay’ng lawas ni Jan Gerick Gestopa mao ang igsuon sa huwis nga si Cesar.

Si Jan Gerick, 21 anyos, buot untang luwason sa iyang mga apohan dihang miulbo ang sunog niadtong Lunes sa kaadlawon didto sa ilang balay sa Zamora St., barangay Centro, Mandaue City.

Apan wala na makagawas ang retiradong huwis ug ang iyang asawa, ug napalgan nalang ang napaig nilang mga lawas niadtong Lunes sa alas 10 a.m. sa buntag.

Bisan giunsa pagsuhid ang tibuok balay, wa gyod makita ang patay’ng lawas ni Jan Gerick.

Kaganihang pasado ala una sa hapon, gisuhid ni Cesar ang tibuok balay ug tupad nga apartment sa sulod sa Gestopa compound.

Sigon sa kasayuran gikan sa suod sa pamilyang Gestopa, didto nakita ang patay’ng lawas sa comfort room sa apartment.

Gipaabot sab nga i-cremate ang patay’ng lawas ni Jan Gerick. Ang iyang mga apohan, si Gerardo, 67 ug Louella, 66, na-cremate na niadtong Lunes. Ang ilang mga abo naa pa karon gihaya sa usa ka punerarya sa Mandaue City.