Gisubhan karong bag-o sa MRII ang bag-o nga multi-million pesos water treatment facility sa Compostela nga gipaabot nga mas makahatag og stable nga supply sa tubig sa Compostela, Liloan ug kasikbit nga mga dapit sa northern part sa Metro Cebu.
Gawas niini, ang Mactan Rock misulod pa gyod og bag-ong deal alang sa desalination plant sa Mandaue City alang sa hingpit nga pagpalambo sa ilang bulk water supply capacity sa tibuok Metro Cebu.
Ang Metro Cebu gilangkuban sa mga lungsod sa Cordova, Compostela, Liloan, Consolacion, San Fernando, uf Minglanilla; ingon man mga Siyudad: Cebu, Mandaue, Lapu-Lapu, Danao, Carcar, Talisay, ug Naga Cities.
Pinaagi sa pakiglambigit sa mga local government units ug sa Metro Cebu Water District o MCWD, ang MRII mohatag og limpyo nga tubig sa mga residente sa Metro Cebu.
Ang Mactan Rock President Lito Maderazo miingon nga ang limpyo nga tubig gikan sa ilang water treatment plant sa Cabadiangan Compostela ilang i-supply sa mga konsumidor sa tubig sa MCWD franchise area sa Compostela, Liloan ug sikbit nga mga dapit.
Ang MRII ug MCWD nagpirmahay og kontrata alang niini diin paliton sa MCWD ang tubig sa Mactan Rock pinaagi sa ubos ug makiangayon nga presyo.
Ang tubig dritso ra kini nga mosulod sa MCWD pipes gikan sa ilang planta.
Ang planta nga dunay 12,500 CMD (cubic meters daily) capacity dili gyud mokuha sa underground water, busa dili mabalaka ang mga tawo sa Compostela nga mohubas ang ilang tinubdan.
Hinonoa, nagsalig kini sa surface water o kining tubig nga midagayday sa Cotcot river diin kini i-tap pinaagi sa proceso nga gitawag og lamella clarifier.
Kining maong planta sa Cabadiangan maoy “first inclined plate lamella clarifier system” nga gipatuman sa Cebu.
Ang lamella clarifier maoy usa sa mga aprobado nga prudukto ug proceso sa England alang sa paggamit sa public water supply.
“Lamella clarifiers are known for their high efficiency clarification process. Choosing lamella over other clarifying systems is a big boost to our aim of providing safe, clean drinking water to consumers,” pasabot ni Maderazo.
Tungod kay nagsalig kini sa surface water, ang gitan-aw lang nga problema sa operasyon mao ang ting-init ug menos ang uwan kay moubos sab ang gidaghanon sa tubig nga modagayday sa sapa.
Sa wa pa ang blessing sa Compostela plant, ang Mactan Rock mipirma sab og deal alang sa laing desalination plant sa Guizo, Mandaue City.
Mahuman ang katukuran sa desalination plant sulod sa unom ka buwan. Kini na maoy ila-12 nga desalination plant sa Mactan Rock sa Cebu.
Ang umaabot nga desalination plant sa Guizo duna usa’y 3,000 CMD.
Nagpasabot nga ang total capacity sa duha ka planta sa Compostela ug Mandaue moabot sa
15,500 cubic meters daily.
Niini, ang Mactan Rock’s total bulk water supply capacity sa Cebu moabot na karon sa 62,500CMD.
Sa maong total production, naa sa 33,500CMD ang naka-kontrata sa MCWD.
Gawas sa MCWD, ang Mactan Rock misilbi sab sa lainlaing commercial ug industrial establishments sama sa malls, refilling stations, hotels ug resorts, ug sa ubang water districts tibuok nasod.
Pagkakaron, ang overall build capacity sa Mactan Rock naa sa 307,227CMD.
