Usa kini sa milutaw sa imbistigasyon sa kapolisan sa disgrasya sa sakyanan sa national highway, North Poblacion, San Fernando, Cebu nga nakakalas sa kinabuhi sa usa ka motorcycle rider ug nakaangol og laing 6 ka mga tawo apil sa usa ka Police officer human gidaro ang 4 pa ka mga motorsiklo daplin sa kalsada alas 3:20 am kagahapon sa kaadlawon (Dominggo, May 23).
Namatay ang motorcycle driver nga si Alex Prangos Amamangpang, 37 anyos ug lumad sa Purok San Vicente 1, Tunghaan, Minglanilla, Cebu.
Ang iyang Suzuki motorsiklo gidumbol niining Mitsubishi Lancer nga gimaneho ni Rodel A. Betualla, 37 anyos ug taga Taboan, brgy. San Isidro, San Fernando, kuyog sa usa ka babaye nga pasahero kinsa giilang si Marisa Ravanes, hingkod ang pangidaron ug taga Minglanilla.
Ang pasiunang imbistigasyon nagpakita nga ang awto nga Mitsubishi Lancer nagsunod sa motorsiklo ni Amamangpang paingon sa Cebu City area.
Kalit lang nga gidumbol sa awto ang motorsiklo ni Amamangpang kinsa nalagpot sa kalsada, ug human niini, gikalis sa awto ang 4 pa ka motorsiklo nga diha daplin sa kalsada kay namainit ang mga sakay, dayon mihamag sab sa gate sa usa ka balay ug mibangga sa usa ka poste.
Namatay dihadiha si Amamangpang samtang nakaangkon og minor injuries ang driver sa awto ug iyang pasahero ug ang drivers sa ubang motorsiklo.
Sigon sa spot report, ang nadala sa ospital sa Carcar mao ang pasahero sa awto nga si Ravanes ug ang driver sa usa sa 4 ka motorsiklo nga nakalis sa daplin– si Ivan Espina Villaceran, 32 anyos, taga South Poblacion, San Fernando.
Na-refer sa rural health center sa lungsod si Betualla kinsa maoy driver sa awto ug ang driver sa laing motorsiklo nga si Police Corporal Mark Steve Tapilot Olan-Olan, taga Toledo City.
Ang laing mga motorsiklo nga nakalis ila ni Adrian Carno Pacardo, 32 anyos, taga San Isidro, San Fernando ug Jerry Morales, 32 anyos, taga Sacsac, Consolacion, Cebu.
Sa interview ni DyLA Reporter Dario Gil kang P/Ssgt. Paul Baclay sa San Fernando Police Station, ilang gisusi ang taho nga nag-away sila si Betualla ug Ravanes mao nga misangko sa dugoong aksidente.
📷 Ssgt. Paul Baclay
