Gikan ni William Shakespeare, kadtong mga talawan kadaghan na mamatay sa di pa moabot ang ilang kamatayon.
Unsaon pagkamatay sa usa ka tawo sa kadaghan nga higayon sa dili pa ang ilang kamatayon?
Sa higayon nga dili kana mahinultol sa imong buhaton, sa higayon nga moundang na ka sa pagbuhat sa angayan nimong buhaton tungod kay nahadlok kang mamatay, daw gipatay na nimo ang imong kaugalingon sa makadaghan nga higayon.
Busa dili gyod maayo nga magpadala kita sa kahadlok taliwa niining hulga sa coronavirus sa atong katilingban.
Apan si Lapu-Lapu City Mayor Junard “Ahong” Chan migamit sa taktika sa pagpanghadlok sa kamatayon sa iyang tinguha nga motuman ang mga tawo sa safety protocols.
Aron mangahadlok ang mga tawo ug dili na mag-gawas-gawas sa ilang balay, iyang gimando nga magbutang og mga lungon sa tanang checkpoint areas sa LapuLapu City.
Gawas niana, may porlon nga gipalibotlibot sa tibuok siyudad.
Sa lungon nga gidisplay sa mga checkpoints ug sa porlon nga nagdagandagan sa Siyudad, may mga itom kining streamers nga nagkanayon:
“Stay at home aron dili ka masulod sa lungon” ug “Namatay sa COVID kay wala mag-facemask.”
Tinuod man nga mahimong mosampot sa kamatayon ang COVID-19, pero pila ra ka porsyento ang namatay niini itandi sa daghang mga naayo.
Dili sab tinuod nga kon magpabilin ra ka sa balay dili ka masakit ug dili ka mamatay. Ingon pa lagi nila, kon turno na nimong kamatayon, moabot gyod na.
Ang pagdiklarar nga namatay sa COVID tungod kay wala mag-facemask, dako sab nga insult sa mga tawong namatay human matapti sa COVId-19. As if silang tanan, mga gahi’g ulo ug wala mag-sul-0ob og facemask.
Apan husto nga ang pagsul-ob og facemask dako og ikatabang aron makalikay ta sa COVID-19.
Si Mayor Chan mismo nagsige og pabibo sa iyang FB account, nagsayaw-sayaw pa nga nagsul-ob og personal protective equipment pero natakdan man gihapon.
Moabot sa 4 ka buwan human nga daw nahunong ang naandan natong kalihukan tungod sa mga quarantine protocols, apan ang atong mga opisyal daw wala na’y mahunahunaan nga tarung nga paagi aron matabangan ang mga tawo sa ilang kahimtang, sa ilang kalisdanan.
Inay nga maninguha nga moabot sa tanan nga panimalay ang hinabang, igo ra’ng hadlokon ang mga tawo sa lungon ug porlon.
Who’s afraid of death? Tingale kitang tanan. Anha kita paingon. Apan kon magpadala ta sa kahadlok, dili ang virus maoy makapatay sa katawhan kon dili ang mapasagaron nga mga opisyal sa kagamhanan.
Wala na mauso ang pagpanghadlok aron maminaw ang mga tawo. Hinoon, tubaga ang ilang panginahanglan aron sila maminaw ug dili mosuki sa mga polisiya nga gustong ipatuman sa gobiyerno.
Naa man kahay magpabadlong, apan pila ra na ka podyot itandi sa mga tawong duna gyoy balido nga rason sa ilang paggawas-gawas.
Atong ipahunumdom ni Mayor Chan ug sa atong ubang mga opisyal ang estorya sa usa ka amahan ug sa inosente niyang anak nga gigutom.
Ang bata nagpunay og hilak kay gigutom. Ang amahan, nagsige og panghadlok sa iyang anak, iya kining giingnan, nga nak.. ayaw sige’g hilak diha kay naay abat.
Hangtod nga ang bata wa makaantos, “Tay, asa ang abat? Mokaon ko’g abat, tay!”
Daghang Salamat
