Nadakpan na ang misibat nga driver sa motorsiklo nga nakadam-ag og laing motorsiklo nga miresulta sa kamatayon sa usa ka magtutudlo sa national highway sa Tunghaan, Minglanilla.

Ang suspek giila sa Minglanilla Municipal Police Station nga si Luigie Go Lazarte, 25 anyos, construction worker nga taga-Sitio Buongon, Barangay Lamacan, Sibonga, Cebu.

Sa follow-up sa dyLA ngadto ni PSSg Mark Rosaroso, Desk Officer sa Minglanilla MPS,
nasayran nga ang suspek nadakpan didto sa balay sa iyang kapuyo sa Kabatbatan, San Fernando, Cebu mga alas 12 kaganihang udto.

Nailhan sa kapulisan ang suspek gumikan sa motorsiklo niining nahibilin human sa aksidente niadtong Martes sa hapon kay natangtang ang ligid.

Nisibat ang driver pinaagi sa pagsakay og bus nga de pasaheroan.

Matod ni PSSg Rosaroso nga pinaagi sa tabang sa LTO, nasubay nga ang nakarehistro nga tag-iya sa motorsiklo mao ang Lolo ni Lazarte ug amaoy nakatug-an kinsay migamit sa maong motorsiklo.

Didto nasuta nga ang suspek nisibat human sa aksidentekay wa diay driver’s license.

Ang iyang nabanggaan mao ang motorsiklo sa magtiayon nga sila si Sherwin Servado, 45 anyos ug ang asawang maestra nga si Charisma Servado, taga Phase 1, Deca Homes Tungkil Minglanilla.

Si Charisma nagtrabaho isip Teacher III sa Minglanilla Central School.

Si Charisma ang namatay ug ang iyang bana nga si Sherwin naa pa sa tambalanan.