Mga tilapia gipasanay sa Loboc river

KARON nga way mga turista nga midugok sa Loboc River sa Bohol, nahukman nga himoon kining dapit pagpasanay sa mga isda alang sa panud-an sa katawhan.

Pinaagi niini, matabangan gihapon ang mga molupyo nga karon apiktado sa paghunong sa mga tourism activities nunot sa enhanced comminity quarantine nga gipatuman sa lainlaing bahin sa nasod tungod sa COVID-19.

Ang Bureau of Fisheries and Aquatic Resources (BFAR 7) ubos ni regional director Dr. Allan Poquita, inabagan ni Bohol provincial fishery officer Candido Samijon, nibuhi og 62,000 ks tilapia fingerlings ngadto sa Loboc river.

Gikan ang maong tilapia fingerlings sa Clarin Freshwater Fish Farm (CFFF), usa sa mga field facilities sa BFAR 7.

Ang BFAR 7 nilusad niining maong programa aron suportahan ang food security measures sa gobiyerno.

Mao kini ang bersiyon sa BFAR 7 sa Plant, Plant, Plant Program sa Agriculture Department apan inay nga mga liso, mga isda ilang gipasanay.

Sigon sa BFAR 7, dili lang ang mga utanon ug prutas ang makahatag og maayong panglawas kon dili bisan ang isda duna usay nutrisyon nga makapalig-on sa immune system sa tawo.

(Contributed Photos gikan sa BFAR)