Gibutyag ni Dr. Jaime Bernadas, ang regional director sa Department of Health (DOH-7), nga adunay dugang 8 nga presumptive positive cases sa rehiyon kagahapong adlawa.
Usa niini gikan sa Negros Oriental, usa sa lungsod sa Cordova ug 6 ang Cebu city.
Una na nga gireport sa DOH niadtong Marso 25 nga adunay 8 nga presumptive positive cases sa Sugbo kon diin usa niini anaa sa Dakbayan sa Lapu-Lapu, usa sa Dakbayan sa Mandaue ug 6 sa Cebu city.
Nagpasabot kini nga ang Dakbayan sa Sugbo adunay pinakadaghan nga “presumptive positive case” nga moabot sa 12.
“For confirmation pa na siya. But we are treating them presumptive positive kay ato naman gihimo ang containment activities,” matod ni Bernadas.
Ang maong mga presumptive cases sa Visayas gipadala pa kini sa Research Institute for Tropical Medicine (RITM) alang sa kompirmasyon.
Ang ilang unang batch nga gipadala ngadto sa RITM wala pa madawat ang resulta sa DOH-7.
Ang containment measure nga gipasabot ni Bernadas mao ang pagpahigayon og contact tracing sa mga nahimamat sa mga “presumptive case” ug pagbutang og containment facilities sa mga local government units.
