“Grabe ang management interventions the past days until now,”sigon ni ALU CVR head Atty. Nora Analyn Demeterio-Diego.
Si Arnold Arcipe, ALU-CVR organizer miingon nga gikatakda unta ang election karong adlawa gikan sa alas 8 sa buntag hangtod alas 3 sa hapon nga gipasiugdahan sa Department of Labor and Employment (DOLE) 7 didto sa vicinity sa Mabuhay Filcement Inc sa South Poblacion, San Fernando.
Apan unang mikwestiyon ang management sa 49 ka empleyado nga dili nila gustong paapilon sa election kay giingong ubos kini sa agency.
Sa pikas bahin, mikuwestiyon sab ang ALU kay dunay 16 ka empleyado nga naa sa supervisory level nga ilang paapilon sa management.
Matod ni Arcipe nga angayan nga mga rank and file employees ra ang moapil.
Nahibaw-an sab nila ni Arcipe nga wa pa-reporta sa trabaho ang mga empleyado ug dunay gipangdala sa management sa usa ka swimming pool sa Mandaue aron lingawon, pakan-on ug paimnon.
Tungod sa gihimo sa management nga daw pagtago sa mga empleyado, mingaw kaayo ang vicinity sa kompaniya.
Sigon ni Arcipe nga mibiya nalang sila sa San Fernando karon apan ilang gi-manifest sa taga DOLE-7 ang ilang protesta sa gihimo sa management.
Matod ni Arcipe nga bisan madayon pa ang election, apan moduso sila og protesta nga madiklarar ang failure of election ug mahulog nga invalid ang resulta niini.
“Bahalag ipadayon nila ang elections, then we’ll just file a protest on the whole proceedings,”dugang sab ni Atty. Diego.
Nalipay unta si Atty. Diego kaniadto dihang natakda sa DOLE ang certification elections tungod kay sulod sa 2 ka tuig, gihimo gyud sa management ang paglangaylangay.
Apan wa gyod mohunong ang management aron mapugngan ang mga empleyado nga makamugna og union ubos sa ALU.
Ang Mabuhay Filcement Inc gipanag-iya sa Benedicto family.
Sagad sa mga empleyado nagdawat og mininum nga sweldo ug karong bag-o, ang ubang mga karaang empleyado gipapirma og kontrata ubos sa manpower agency, sigon ni Arcipe.
Ang management wa pa moluwat og pamahayag sa pasangil.
