Gawas nga polos sila mipasar, 6th placer pa gyud ang lalaki kinsa gikan sa iladong pamilya sa Mandaue City.
Si Sonny Cabahug Redula sa Cebu Institute of Medicine, naa sa ika-6 nga pwesto pinaagi sa 87.50 percent.
Si Redula, 30, taga Looc, Mandaue City, anak ni kanhi Mandaue City Legal officer Omar Redula ug Dra. Vicky Cabahug Redula.
Ang uyab ni Redula nga si Mara Bernadette Liston mipasar sab sa board basi sa resulta nga migawas kaganihang kaadlawon.
“Kada adlaw magkuyog mi og tuon, dako kaayo siyag suporta nako sir,”sigon ni Redula sa dyLA interview.
Ang pagbaton og uyab alang ni Redula nakatabang niya ug wa maghatag og distraction sa iyang pagtuon.
Matod ni Redula nagpasalamat siya sa Ginoo nga gihatagan siyag uyab nga andam mosuporta ug mosabot sa iyang sitwasyon, ug wa maghatag og labad sa ulo.
“Importante baya gyud nga focus ka sa imong pag-eskwela, kay lisod na kaayo kon maghunahuna ka sa imong pag-eskwela unya may problema pa sa pagka-uyab. Swerte kaayo ko kay ang akong nauyab grabe gyud mosuporta,”dugang ni Redula sa dyLA interview.
Si Redula niingon nga mao sab sa ubang classmates diin sila nagtinabangay sa review.
Si Redula ug Liston nagkaila sa ilang first year sa medical school diin sila group mate.
Didto nagsugod ang ilang paghigugmaay.
Samtang 7th placer sa bar iyang amahan nga si Atty. Omar, matod ni Redula nga siya ug duha niya ka igsuon mas na-inpluwensiya sa inahan nga si Dra. Vicky kinsa usa ka retired medical doctor.
Ang iyang duha ka maguwang naa sab sa medical profession. Ang igsuon babaye si Kitty usa ka doctor ug si Billy nagtrabaho isip nurse sa US.
Si Redula mihuman sa elementary, high school ug pre-med studies sa US. Gani, mihuman siya sa Microbiology course sa Florida.
Matod ni Redula nga gusto siyang mahimong doctor aron makatabang sa uban.
Nagplano siya nga mag-specialize sa Internal Medicine alang sa iyang residency training.
Iyang gipasalamatan ang iyang ginikanan, mga igsuon, uyab, mga higala nga mitabang niya ug sa Ginoo nga maoy iyang gitugyanan sa tanan.
đź“·Courtesy of Dr. Sonny Redula
