“Tinalaga po ni President Rodrigo Duterte si Debold Sinas bilang bagong Philippine National Police chief effective po bukas, November 10,” matod ni presidential spokesperson Harry Roque sa online online briefing.
Si Sinas maoy mopuli sa iyang upperclassman, General Camilo Cascolan sa Philippine Military Academy (PMA) Sinagtala Class of 1986, kinsa moretiro ugma, Martes.
Si Sinas sakop sa PMA Hinirang Class of 1987. Siya maoy labing unang tinudlo ni Duterte gawas sa 1986 class.
Gilat-angan ni Sinas ang incumbent second-in-command Lieutenant General Guillermo Eleazar ug ang incumbent third-in-command Lieutenant General Cesar Binag, kinsa polos niya classmates sa PMA.
Kon nganong siya ang gitudlo ni Presidente Duterte, matod ni Roque nga tungod sa tabang ni Sinas sa kampanya batok sa illegal drugs.
“President Duterte has been saying for a long time what a big help he has been to the war on drugs,” sigon ni Roque.
Gani ang marching order ni Duterte kang Sinas, nga ipadayon ang “war on drugs”.
Si Sinas nga maoy ika-5 nga PNP Chief ni Duterte, motapos sa iyang termino sa Mayo 8, 2021, diin moedad na siyag 56 nga maoy mandatory age of retirement sa mga polis.
Nakamugna og kontrobersiya si Sinas tungod sa mańanita party niadtong Mayo atol sa iyang 55th birthday, bisan gidili ang mass gathering tungod sa pandemya.
Ang mga hulagway migawas mismo sa Metro Manila public information office nga nagpakita ni Sinas ug sa iyang mga sakop nga diha sa morning party sa Metro Manila police headquarter sa Camp Bagong Diwa diin wa silay physical distancing atol sa ilang panagtapok.
Si Sinas midepensa nga wa siyay kalibutan sa giplanong party sa iyang mga sakop ug wa nalang sab niya abuga.
Ang PNP mi-file gyod og criminal ug administrative charges batok ni Sinas ug 18 ka personnel.
