Dunay lungon ipahimutang sa mga checkpoints samtang porlon patuyokon sa Siyudad sa Lapulapu aron pagpahimatngon sa mga tawo nga mahimo silang mamatay sa COVID-19 kon dili motuman sa safety protocols sama sa pagsul-ob og facemasks, pagtuman sa social distancing, pagpanghunaw o kaha pagpuyo sa balay.

Si Lapu-Lapu City Mayor Junard “Ahong” Chan miingon nga daghan gihapon ang mga gahi’g ulo bisan kon ubay-ubay na ang namatay tungod sa COVID-19.

“Kaganihang buntag, kay kuwang naman kita og magbalantay sa atong mga checkpoints, nag-setup kita og lungon sa mga checkpoints para mopadangat og mensahe sa tanan nga dili tiaw ug dili komedya ang COVID-19 ug kini makamatay,”sigon ni Chan sa iyang fb page.

Matod ni Chan nga duna nay 38 ka tawo nga nakalas sa Lapulapu City; 1,290 sa tibuok Pilinas ug 525,491 sa tibuok kalibutan.

“Lain pa niana, nagpadagan pod kita og porlon nga molibot sa tibuok syudad nga nagtukar og mga kanta nga masulob-on. Naghatag kini og mensahe nga mao kini ang posible nga mahitabo nimo kung padayon ang pagmagahi sa inyung ulo,”dugang sa mayor.

Nanghatag sab si Chan og mga flyers nga may mga mensahe kalabot sa kapiligro sa COVId-19 ug mahimong mamatay kita kon dili magsul-ob og facemask.

(Photos: Gikan sa fb page ni Mayor Chan)