MAO kini ang nalitok sa usa ka lolo human pakyawa ang iyang gitudtud nga ice cream sa Plaza Independencia sa Cebu City sa Dominggo sa hapon (Oktubre 24.)
Ang magtiayong Eddie ug Sheba Daryl Macasero, dili mga politiko apan wa sila maglangay sa pagpakyaw sa tindang ice cream nga nga nakapalipay sa mga tawo- bata, hingkod og mga tiguwang.
Ilang gipakyaw ang ice cream ni Lolo Jacinto Peligrino, 72 anyos, didto sa Plaza Independencia. Kinsa man ang molabay, nakatilaw sa ice cream ug ang uban, gihatagan nila og bottled water.
Si Lolo Jacinto, taga barangay San Nicolas, Cebu City, miingon nga matag Dominggo.siya mamaligya og ice cream. Ang kantidad sa ice cream nga iyang gi-tudtud naa sa P2,000 ug kon mahurot kahalin, moginansya siyag mga P500.
Matod ni Lolo Jacinto, dako niyang kalipay ug nagpasalamat siya sa Ginoo nga nasugatan niya ang buotang magtiayon ug sayo siya makauli sa ila.
Kon wa pa kini pakyawa, maghuwat gyud intawon siya nga paliton ang ice cream nga tag P10 ang scoop.
Ang Macasero couple, taga Springwood, Minglanilla, dunay mga negosyo lakip sa ginabutan diha sa Talisay.
Nasundan nila si Lolo nga nagtulod sa lata sa ice cream mao nga naluoy sila ug aron makapauli nila, gipakyaw nila ang ice cream ni Lolo Jacinto ug kinsa man ang moagi ilang gihatagan.
Sigon nila, pirmi nilang himoon nga manghatag og pagkaon sa mga tawo daplin sa dalan.
Ila kining pasalamat sa maayong dagan sa ilang negosyo.