Lapulapu City Mayor Ahong Chan mitanyag og P1M cash reward aron madakpan ang mipatay sa konsehal sa Mactan

MOKABAT sa P1-Million cash reward ang gitanyag ni Lapulapu City Mayor Junard ‘Ahong’ Chan alang sa makatudlo ug aron madakpan ang mga mamumuno ni Zandro Augusto, negosyante ug konsehal sa Mactan, Lapulapu City.

Si Augusto gipatay alas 7 sa gabii niadtong Sabado (September 19, 2020) gawas sa iyang pawnshop.

“Labing una kini nga hitabo ubos sa akong administrasyon diin usa ka opisyal sa Barangay niluog nga gihunosan sa iyang kinabuhi,”sigon sa mayor sa iyang fb post.

Matod ni Chan nga si Augusto usa ka kugihan nga barangay opisyal ug nipili nga mahimong frontliner atol sa COVID-19 pandemic.

Gusto karon ni Chan nga mahatagan og hustisya ang krimen.

Matod ni Chan nga kusganon niyang gikondinar ang linuog nga pagpatay sa konsehal.

“Tungod niini, mohatag ako og reward money sa kantidad nga 1 MILLION PESOS ngadto sa tawo nga makatudlo kon si kinsa ang mga suspetsado ang nihimo sa maong krimen,”sigon ni Chan.

Alang sa may impormasyon, mahimong mo-text ug motawag sa mga numero 09989673794 or +639393711288.

(Photos: contributed photo)