Gikan sa labing gamay nga Philippine currency unit nga one-centavo coin, ang local chieftain sa Mactan nga maoy nakabuntog sa pwersa sa Portuguese explorer Ferdinand Magellan makita na sa usa sa labing dako nga currency denominations nga gi-isyu sa Bangko Sentral ng Pilipinas o BSP.
Ang BSP kauban sa National Quincentennial Committee (NQC), milusad kagahapon (January 17, 2021) sa P5,000 Lapu-Lapu commemorative banknote ug medalya isip pagsugod sa 99-day countdown paingon sa 500th anniversary sa “Victory at Mactan” o Kadaugan sa Mactan.
Ang Lapu-Lapu banknote maoy ikaduhang labing taas nga currency denomination nga gi-isyu sa central bank human sa limited edition P100,000 bill nga gigama alang sa Philippines centennial year niadtong 1998.
Sa usa ka seremonya nga gihimo sa BSP Complex sa Manila, si BSP officer in charge Francisco Dakila Jr. ug Senior Assistant Governor Dahlia Luna mipresentar sa banknote ug medalya ngadto ni Executive Secretary Salvador Medialdea, kinsa maoy midawat niini sa ngan ni President Duterte.
Matod ni Dakila nga ang commemorative banknote ug medalya gitumong aron pagsaulog sa kamabayanihon ni Lapu-Lapu.
“The BSP and NQC have collaborated on this commemorative banknote and medal to celebrate the heroism of Lapu-Lapu and his warriors, and to familiarize the present generation with the country’s rich precolonial history,” sigon ni Dakila.
Ang kasaulogan sa 500th anniversary sa kadaugan sa Mactan maoy kabahin sa 2021 quincentennial commemorations sa Pilipinas.
Usa kini ka importante nga yugto sa nasod diin nadala sa atong nasod ang Kristyanismo mao nga ang simbahang Katoliko mohimo sab og daghang kalihukan alang sa ika-500 ka tuig nga pagabot sa Kristyanismo sa nasod.
Sa Lapu-Lapu banknote makita ang batan-ong Lapu-Lapu, ang imahen sa battle of Mactan, ang QCP logo, ug ang “karakoa,” na usa ka dakong outrigger warships nga gigamit sa mga Filipino sa unang panahon.
Sa pikas nga bahin sa kwarta, makita sab ang Philippine eagle o ang Manaol, nga maoy nagsimbolo sa klarong panglantaw, kagawasan ug kalig-on; ug nagdala sab kini sa ancient Visayan belief nga ang tanang mga buhing nilalang nagagikan sa agila.
Na-feature sab sa banknote ang punoan sa lubi, nga maoy gikuhaan sa pagkaon sa mga tawo sa Samar nga ilang gihatag ni Magellan ug sa iyang crew ug ang Mount Apo sa Mindanao, diin ang Spanish expedition nakakaplag sa direksiyon sa ilang puntiriya sa Maluku o ang Spice Island.
Ang medalya dunay marka nga “Lapulapu” ibabaw sa Lapu-Lapu Shrine sa Cebu, ingon man logos sa QCP ug BSP. Sa likod makita ang marka nga “Battle of Mactan,” ang rendition sa battle of Mactan, ug petsa nga “27 April 1521.”
