PATAY na nga napalgan daplin sa kalsada sa Campo 5, Manipis, Talisay City, Cebu ang wa mailhi’ng lalaki pasado alas 7 kaganihang buntag, Miyerkules (Pebrero 19, 2020).
Si Police Major Gerard Ace Pelare, hepe sa kapolisan sa Dakbayan sa Talisay, miingon nga sigon sa mga saksi, dunay itom nga sakyanan nga miagi sa maong dapit ug may buto-buto sa armas nga nadungog.
Ang patay’ng lawas may taptap nga panapton ang nawong ug naghukas na kini.
Pasiunang taho sa kapolisan, dunay kini upat ka samad pinusilan ug napalgan sa crime scene ang upat sab ka kabhang sa bala gikan sa wa pa matino nga kalibre sa armas.
Sigon sa kapolisan, dunay nakita nga 4 ka gagmay’ng putos sa shabu sa posisyon sa biktima.
May nakita nga pipila ka dokumento nga nagbutang og posibleng iyang pangalan apan gisusi pa kini sa kapolisan. Gibanabana nga nag-edad ang maong lalaki sa 20 ngadto sa 30 anyos.
