Gipatuman sa kadagkuan sa Police Regional Office (PRO-7) uban sa Philippine Drug Enforcement Agency sa Central Visayas (PDEA-7) ug Anti Money Laundering Council (AMLC) ang “freeze/preservation order” sa mga properties sa inila nga drug personalities nga sila si Rustico Ygot ug iyang uyab nga si Jocelyn Encila.
Kahinumduman nga si Encila nasikop sa kapulisan ug PDEA-7 niadtong Marso 2019 human nakuhaan og 10 ka kilo sa shabu nga nagkantidad og P68 milyones pesos sa lungsod sa Consolacion.
Si Encila ang giingon nga nagpadayon sa ilegal nga kalihukan ni Ygot kinsa nagtingkagol sa New Bilibid Prison niadto pa’ng 2010.
Matod ni Brigadier General Albert Ignatius Ferro, ang director sa PRO-7, nga 6 ka bank accounts samtang 7 ka properties nilang Ygot ug Encila ang gipang-freeze sa AMLC samtang nagpadayon ang forfeiture case nila.
Kaganinang buntag, ang 2 ka properties ni Ygot nga naa sa Barangay Casili ug Barangay Jugan ang giadto sa mga awtoridad.
Naglangkob kini sa usa duha ka andana nga balay ug tulo ka andana nga apartment building nga giingon nga gipuy-an sa mga kaliwat ni Ygot. Giingong nagkantidad kini og P10-Million ang 2 ka properties.
Sigon ni General Ferro nga ang duha ka mga properties giingong gihimong bodega sa mga shabu ni Ygot ug gikatahong dinhi magpahigayon og ilegal nga kalihukan ang mga giingong drug personalities.
(Ang hulagway mao ang property ni Ygot sa Jugan. Consolacion)
