Ang 3-day seminar nga gipahigayon sa JSU-PSU MARINERS COURT CEBU, dunay tema nga “Stress: Understanding, Early Management and Coping.
Sa interview sa dyLA ni Chowdury, base sa ilang gihimo nga research kauban sa Yale University sa USA, ilang natala nga 20% sa tanang seaman sa tibuok kalibutan dunay mga mental health issues.
Kasagaran nila kadtong mga cadets og apprentice nga bag-ohay palang nisakay og barko.
Dugang niini, 25% sa mga seafarers ang dunay depression samtang 17% ang nahiagom sa kabalaka o anxiety disorder.
Tungod niini, ang ITF nagpahigayon og mga seminar alang sa mga maritime teachers ug trainers aron sa pag- andam sa ilang mga tinun-an ug aron pagbuntog sa stress nga kanunay nga makaapikto sa trabaho labi pa sa mga seaman nga layo kanunay sa pamilya.
Ila sab nga gidasig ang matag usa nga mga seafarers nga dunay problema ug mga yangungo sa pagtrabahao nga mosulti ug modangop lang sa International Transport Workers Federation kay andam silang motabang sa bisan unsang paagi.
Ang ITF nagpanalipod sa katungod sa mga transport workers apil sa land-based ug mga seafarers, ug mao ngq mihimo niining maong seminar aron pagbuntog sa stress nga kanunay nga makaapikto sa trabahador labi pa sa mga seafarers nga layo kanunay sa pamilya.
Usa sa mitabang aron mapahigayon ang seminar mao si Niño Mike Torrevillas nga ITF INSPECTOR sa Pilipinas.
Gitambungan kini sa mga maritime professors/teachers sa lainlaing universities, mga manning agencies sa mga seafarers ug mga personnel sa Associated Labor Unions (ALU) pinangulohan ni Sister Eva Arcos, kinsa maoy ALU National Vice President for Education and Information.
Lakip sa mga tunghaan nga mipadala og representante mao ang UC-METC (Maritime Education and Training Center), University of Visayas main.
Ang mga speakers mao si Mr. Steve Trowsdale kinsa maoy ITF Inspectorate Coordinator, Dr. Syed Asif Altaf Chowdury kinsa ITF Wellbeing Program Coordinator ug Atty. Karl Frederick Arriola, Department of Migrant Workers Regional Director.
Si Torrevillas sa iyang bahin miingon nga ilang giimbitar ang mga trainers ug mga magtutudlo sa mga maritime students aron nga ilang mapaabot ngadto sa ilang mga tinun-an ang risgo sa mental health sa usa ka seaman kung magsugod na og sakay sa barko.
Una kining higayon nga gihimo sa Pilipinas ug mismo dinhi sa siyudad sa Cebu ang maong kalihukan tungod kay ang nasod sa Pilipinas usa sa mga providers og mga workers nga mosakay sa barko.
Matod ni Torrevillas nga human sa Sugbo, moadto sila sa ubang lugar sa Pilipinas aron maghimo’g susama niini nga seminar aron mahatagan og dugang kahibawo ang mga magtutudlo unsa ilang makontribute sa mental health sa kabataan hilabina sa mga ganahan mokuha sa kurso nga nautical.
via| Jonathan Caballero
