NALANDIG sa tambalanan ang hepe sa kapolisan sa Santander ug ang iyang usa ka sakop sa aksidente nga naglambigit sa 4 ka sakyanan, apil ang ilang patrol car sa National Highway sa Brgy. Nueva Caceres, Oslob, Cebu pasado alas 3 karong hapon.

Ang mga samaran ug nadala sa Oslob District Hospital mao si PLT Michael G. Calaurian, hepe sa Santander Municipal PoliceStation, ug ang driver sa patrol car nga si PSSg Jeicel Yrauda.

Basi sa pasiunang imbistigasyon sa kapulisan sa Oslob ubos ni Police Captain Ian T Macatangay, nasayran sa dyLA nga samtang nagtadlas ang patrol car sa highway paingon sa Santander, ang nagsunod nga Isuzu aluminum van nga gimaneho ni Rio Guiragay nga taga Brgy. San Roque, Cebu City, ang misuway og overtake sa patrol car.

Apan igo sab nga pagsubay sa pikas lane sa aluminum van, may gikasugat kining usa ka Toyota Hi Ace GL Grandia nga gimaneho ni Paulino Romas nga taga Bangcogon Oslob, hinungdan nga naigo ang left side mirror sa maong Grandia, ug ang patrol car na igo usab sa Isuzu aluminum van.

Sa kakusog nga impact, ang patrol car miigo usab sa Fuso truck with railings nga gimaneho ni Arnolfo Tenepre nga taga Poblacion Malabuyoc Cebu.

Gawas sa Santander Police Chief ug iyang sakop nga nadala sa ospital, wala ra maunsa ang sakay sa ubang mga sakyanan.

Ang driver sa aluminum van nga si Guiragay gidala sa Oslob Police Station.

📷Oslob Municipal Police Station via Dario Gil