Kon gusto sa Cebu City government ug sa Cebu City Health Department nga makakuha sila sa pagsalig ug suporta sa katawhan, dili nila undangon ang paghatag og hustong kasayuran sa publiko kalabot sa mga COVID-19 cases sa dakbayan.
Gipahibawo sa City City Health Department (CCHD) nga undangon na nila ang paghatag og daily updates sa mga kaso sa coronavirus sa Cebu City diha sa ilang Facebook page.
Ilang gipasabot nga pinasikad kini sa rekomemdasyon sa Inter-Agency Task Force o IATF aron malikayan ang kalibog sa mga tawo.
Nabantayan man gud nga lahi ang numero nga gipagawas sa City Health Department sa gidaghanon sa mga COVID-19 cases matag adlaw, itandi sa report gikan sa Department of Health (DOH 7).
Hinungdan nga adto nalang pakuhaon ang publiko og kasayuran gikan sa DOH 7.
“We will no longer be posting daily reports on our page for the Cebu City COVID-19 Monitoring. This was recommended by the IATF to avoid confusion with the public as we are still harmonizing data with other health departments,” sigon sa CCHD.
Gipasabot sa City Health Department nga ang ilang gipahibawo matag adlaw mao gyod ang actual cases nga na-validate sa ilang contact tracing teams.
Una nang mibadlong ang DOH-7 sa mga local government units nga dili mopublikar og raw data, kon dili ang data nga nasusi na sa Regional Epidemiology Surveillance Unit (RESU).
Pagkaluoran ba sab niining Cebu City Health Department. Wa man sila mando-i nga dili na mohatag og report ngadto sa publiko.
Ang gusto sa DOH-7 nga ibasi ang ilang report sa verified data sa DOH 7 sama sa gihimo sa ubang mga LGUs.
Tan-awa ang Mandaue City, Lapu-Lapu City, Talisay City ug ubang mga LGUs sa province, nakahimo sila sa paghatag sa hustong impormasyon nga wa makahatag og kalibog sa mga tawo, ug duna pa gyoy pipila ka detalye gawas sa kasayuran kon asa nga barangay, duna pa’y kasayuran sa edad ug kon unsay background nianang tawhana nga nag-positibo.
Kon mag-agad nalang ta sa DOH-7, ang mga tawo sa Cebu City magduhiraw kon asa man nga barangay ang mga bag-ong kaso.
Kini tungod kay ang DOH-7 igo ra mohatag og numero, apan walay detalye sa matag barangay.
Busa atong gisugot nga kon di naman mohatag og report ang City Health, si Mayor Edgar Labella mosangon sa iyang public information office o PIO nga maoy mohatag sa matag adlaw nga kasayuran.
Ang ubang mga netizens nangalipay kay husto kono’ng dili na kita magsige og ihap pila ang mga kaso kay nakahatag kini og kahadlok sa mga tawo. Daghan ang mag-panic labi pa kon anang adlawa, daghan kaayong kaso ang matala.
Tinuod kana.
Sa pikas bahin, lisod sab kon dili masayod ang publiko nga sa ilang barangay daghan na diay’ng kaso sa COVID 19.
Kon way klarong kasayuran nga ihatag ang Cebu City government sa mga COVID-19 cases sa Siyudad sa Sugbo, susama kita sa mga tawo’ng naglatagaw.
Kon naglakaw ka sa usa ka ngi-ob nga dalan, unsa mas palabihon nimo— mahibawo ka’ng daan nga may kimba sa unahan o wala ka masayod kon unsay naa sa imong padulngan?
Ang kasayuran mahinungdanon kaayo’ng aspeto sa atong kinabuhi.
Makapangandam ka kon nakasayod ka nga may dakong bato o kimba nga naghuwat sa agianan.
Apan kon wa kay kalibutan sa nagpaabot nimo sa dalan nga imong gilaktan, mahimong mapangka ka sa bato o mahagbong ka sa lawom nga kimba.
Kining gihimo sa Cebu City Health Department susama ra nga ila’ng gikuhaan og usa ka ang-ang ang usa ka hagdan.
Kita’ng katawhan nga way kasayuran, sigurado gyod nga mahitiurok.
Daghang Salamat
