Gitumbok mismo ni Damolog barangay captain Gaspar Monisit nga ang gitukod nga retaining wall sa usa ka road project maoy nakaingon sa grabeng pagbaha pasado alas 5 kagahapon sa hapon.
Sa interview sa dyLA, si Monisit miingon nga wa gyud sila mabahai kaniadto sa wa pa gitukod ang retaining wall nga maoy nakaingon nga naalihan ang mga existing culverts.
Kay wa na kaambak ang tubig sa ubos, didto kini misanap sa kalsada ug kabalayan pag-igo sa uwan ug sa ilang pagtuo, may buhawi sab mga miigo.
Matod ni Monisit nga taga-liog na sa tawo ang tubig pagbaha, hinoon mihubas ra kini paglabay sa 30 minutos.
Apan daghan ang nadanyos, lakip ang mga balay, tindahan, ug kan-anan daplin sa kalsada.
Gani, ang portion sa restaurant nga iya ni Monisit nahun-ag sab. Nasudlan sab ang computer shop ni Arnejo.
Si Monisit miingon nga kinahanglang manubag niini ang contractor nga mao ang Benray Construction.
