Giila ang nadakpan nga si Wilfredo Sabella, 53 anyos, nga taga Barangay Buhisan ug giisip sa Cebu City Police Office (CCPO) nga numero unong wanted person sa Dakbayan sa kasong murder.
Sa pasiunang pakisusi sa kapulisan, matod sa CIB nga si Sabella gikatahong sakop sa usa ka gun-for-hire group nga konektado sa namatay nga self-confessed druglord nga si Franz Sabalones.
Gihimakak hinoon ni Sabella nga usa siya ka gunman nga nagtrabaho kang Sabalones apan giangkon sa suspetsado nga nakatrabaho siya makadiyot sa ilado usab nga gun-for-hire group leader nga si Jerome Labitad.
Kahinumduman nga ang grupo ni Labitad ang gitumbok sa kapulisan nga responsable sa pagpamanhig kang San Fernando Mayor Lakambini Reluya niadtong Pebrero 2019 diin namatay ang bana niini ug 2 ka staff.
Giangkon usab ni Sabella nga nakapatay gyud siya niadtong tuig 2001 nga iyang giingon nga iyang napusilan kay nangawat sa iyahang manok nga pula.