Si John Paul Lato, crew sa MV Good Fortune sa Tektite Shipping, unang nipost sa social media alas 11:30 am karong adlawa, Dominggo (October 25) sa ilang sitwasyon samtang nagbiyahe gikan sa San Fernando, Cebu paingon sa Tacloban City, Leyte.
Niadtong tungura, naa sila sa tungatunga sa Bohol ug Maasin, Southern Leyte.
“Emergency tabang tawag coast guard! MV good fortune! sudlan nami tubig! duolramis bohol!palihog ko salamat distress nami ron! Pray for us,”sigon ni Lato sa iyang post.
Human sa iyang post, nag-live siya sa FB diin makita si Lato ug ubang crew nga nagsul-ob na daan og life jackets samtang makita ang tubig nga misulod sa barko.
Ang amigo ni Lato nga si Liboy Ventures, kanhi cook sa barko, miforward sa video sa iyang amigo sa dyLA.
Ang dyLA mipost niini ug sa samang higayon, gi-chat ang mga kaila sa Coast Guard.
Wa madugay, nagbanosbanos sa pagpanawag sa dyLA ang mga personnel sa Coast Guard Station sa Maasin ug Coast Guard District Central Visayas aron mangayo og dugang kasayuran.
Paglabay sa pipila ka minutos, na-verify sa dyLA sa Coast Guard Maasin ug sa Coast Guard Central Visayas nga na-locate ang MV Good Fortune ug naka-drop anchor kini sa Lapinig Island, Pitogo o President Carlos P. Garcia sa Bohol.
Ang rescue vessel sa Coast Guard sa Ubay, Bohol ug laing rescue vessel gikan sa Pier 1 Cebu City mipaingon sa area aron pagsusi sa barko, kon wa na bay piligro ug kon unsay gikinahanglan sa crew, sigon sa Coast Guard personnel.
Ang barko nakasugat og kusog nga hangin ug dagkong bawod hinungdan nga nasudlan kinig tubig ug napawong ang makina.
“Initial inquiry conducted with the ship captain revealed that while underway at said vicinity they encountered strong winds and big waves and the main engines malfunctoined brought by the ingress of seawater into ship deck,”sigon sab sa update report sa Coast Guard Central Visayas.
Ang dapit nga kini naka ankorahi naa sa LAT 10 DEG 02.626’ N, LONG 10 DEG 40.568’ E. 4.5 NM SE of Lapinig Island.
Apan alas 3 pm, si Lato mipost na sab sa FB ug nanghangyo nga ipadali ang rescue sa Coast Guard.
“Coastguard tabang gikulata namig bawd diri! di mo andar makina namo naay tubig engine room hinayhinayan namog kuha! naka drop anchor mi sa port side,”sigon ni Lato.
Nasayran sa dyLA nga alas 4:40 pm karong hapon miabot ang rescue vessel sa Coast Guard Eastern Bohol nga nakabasi sa Ubay didto sa nahimutangan sa MV Good Fortune.
Ang mga Coast Guard personnel misakay dayon sa barko aron pagsusi sa condition niini.
Naguba o dunay leaking ang vacuum breaker sa barko hinungdan nga nakasulod ang tubig pagkusokuso sa dagkong bawod.
Matod ni Apprentice seaman Justine Faustino sa Coast Guard District Central Visayas, giayo na ang leaking ug gikuha na sab ang tubig nga nakasulod sa enginee room.
Sigon ni Faustino nga gi-warm up ang makina aron makabalhin og laing location duol sa Lapinig Island nga dili kaayo bawuron, aron adto motago o mo-take shelter karong gabii.
Ang MV Good Fortune dunay karga nga 1,639.680 MT nga semento gikan sa San Fernando Cebu ( dili Naga City) paingon sa Tacloban, matod ni Faustino.
Duna kini 14 ka crew pinangulohan ni Capt. Charlie Jesus Sollegue Jr.
Matod ni Faustino nga maisip na nga ‘safe’ ang crew sa barko.
Ang kapitan sa barko dunay communication nila sa Coast Guard Central Visayas, sigon ni Faustino.
(Photo: screenshot sa video ni John Paul Lato, crew sa barko)
