Sa iyang suwat ngadto ni Labella karong adlawa, Disyembre 9, miingon si Cimatu nga ang Cebu City mipakita gyod sa kalig-on o resiliency, ingon man pagka-determinado sa pakig-away sa coronavirus.
Matod ni Cimatu nga nasaksihan niya kini sulod sa pila ka buwan nga gidestino siya ni Presidente Duterte aron mahimong overseer sa COVID19 response sa dakbayan sa Sugbo.
Ang Cebu City, sigon ni Cimatu, gikan sa pagka-epicenter sa COVID19 pandemic sa nasod, karon nahimong epitome ug golden standard nga angayang sundon sa ubang lokalidad human nga milampos ang pag-flattened sa COVID19 curve.
“What the City of Cebu has shown the nation is such an achievement,”sigon ni Cimatu.
Gipanghinaut ni Cimatu nga ipadayon sa Cebu City ang pagsiguro sa kaluwasan sa mga tawo gikan sa coronavirus.
Gihangop dayon ni Labella ang suwat ni Cimatu kay pagmatuod kini nga nagbunga ang tanang paningkamot.
“Akong dakong pasalamat kang Secretary Cimatu sa iyang pag-ila sa gipangbuhat sa mga opisyales sa Dakbayan sa Sugbo aron mapaubos ang mga kaso sa COVID-19,”sigon ni Labella sa FB post.
“This is a triumph not just of the City Government but the whole of Cebu City. With the cooperation of the people, I assure the Secretary that we will remain relentless in our fight against this disease that has severely impacted not just our city but the whole world,”dugang niya.
