Ang pagbalibad sa trabahante sa bakuna dili gyod ground sa termination, matod ni Bello, kinsa kaniadto nahimo sab nga secretary of justice.
“There is no legal basis for an employer to require workers to be vaccinated before they enter the workplace,” sigon ni Bello atol sa online news briefing.
Ang Associated Labor Unions (ALU), ang labing dako nga kahugpongan sa trade unions sa nasod, misaway sa “no vaccination, no work” policy nga giingong mitumaw taliwa sa pagsugod na sa gobiyerno sa COVID-19 vaccination drive sa mga health workers.
Ang ALU mitaho nga dunay mga kompaniya nga mipasidaan na sa mga empleyado nga dili sila tugtan nga motrabaho kon dili magpabakuna.
Ang ubang kompaniya giingong mibahad pa nga ibalhin sa laing branches kadtong dili magpabakuna o pugson sa pagpabakasyon.
Alang sa ALU, ang mandatory vaccination maisip nga matang sa coercion o pagpamugos ug usa kini ka diskriminasyon nga nakalapas sa katungod sa mga trabahador.
“They can’t make [vaccination] mandatory. It’s up to the employee to say whether he will get vaccinated. The refusal to be vaccinated is not ground for termination,” pasabot ni Bello.
Duna nay draft guidelines nga gipagawas ang DOLE batok niining maong polisiya ug gikuhaan og opinyon ang ALU isip usa sa mga stakeholders.
Sigon ni Alan Tanjusay, tigpamaba sa ALU, wa silay pagsupak sa draft guidelines nga naglatid nga dili gyod mahimong ipugos sa trabahante ang bakuna kon dili kini gusto. Ang mga kompaniya nga dunay kaugalingong vaccination program kinahanglang dili mo-charge sa empleyado sa gasto sa bakuna.
