Sa pakighinabi sa dyLA, matod ni DepEd-7 regional drector Salustiano Jimenez nga sugod kaganinang buntag hangtod karong hapon, wa pa siya’y nadawat nga report nga adunay kakuli-an sa pag abli sa klase ug wa usab sila’y nadawat nga reklamo gikan sa mga estudyante ug ginikanan dinhi sa rehiyon 7.
Sigon ni Jimenez nga nag-monitor ug nibisita siya sa mga tunghaan ilabi na dinhi sa Dakbayan sa Sugbo ug nasuta niya nga hapsay ug way mga dagkong suliran nga nitumaw.
Apan giangkon hinoon ni Jimenez nga adunay mga nagtungha sa high school ang wala nakakuha sa ilahang modules karong adlawa gumikan kay mga late enrollees ang maong mga estudyante.
Nagkanayon ang director nga sa Mabolo National High School sa Cebu City, adunay gatusan ka mga estudyante ang wala pa’y module sanglit niadtong Biyernes ug Sabado palang sila nagpa-enrol ug nga gi-proseso pa ang ilang mga module.
Karon bisan nagsugod na ang klase, sigon ni Jimenez nga padayon gibapon sila nga manawat og mga late enrollees hangtod sa unang semana sa buwan sa Nobiyembre.
Apan awhag karon sa Deped 7 regional director ngadto sa mga ginikanan nga i-enrol dayon ang ilang mga anak karon aron dili mauwahi sa klase ug di usab mauwahi og dawat sa ilang modules nga kinahanglan pa ipa-print sa mga tunghaan.
Base sa record sa DepEd 7, niabot ngadto sa 1,759,913 ang mga ni-enrol karon sa mga pampublikong tunghaan dinhi sa Central Visayas.
Apan sa mga nagpa enrol sa private schools, anaa lang sa 182,000 o 59 percent lang kini sa mga nagpa-enrol sa private schools sa niaging tuig.
