ADUNAY nakalas nga kinabuhi sa sunog alas 5:49 kaganihang buntag didto sa Sitio Sangi, Brgy. Pajo, Lapu-Lapu City.

Ang kabomberohan sa Lapu-Lapu City miingon nga ang nakalas mao si Cherubem Ybañez, 26-anyos dalaga nga nagtrabaho isip call center agent kinsa na-trap sa ilang balay nga nasunog.

Ang iyang inahan nga si Micacia Ybañez giingong nakaangkon og first degree burn sa iyang tuong bugton.

Si F02 Jeoffry Gerodias, ang fire investigator sa BFP 7 Lapu-Lapu City Cebu, mitug-an sa dyLA nga ang sunog mi-ulbo sa silong sa dos-andana nga balay sa pamilyang Ybañez.

Ang kayo giingong nikaon sa hagdanan nga bahin mao nga si Cherubem bisan kon nakamata man apan na na-trap siya ug naapil sa pagkasunog sa ilang balay.

Gisusi pa unsay hinungdan sa sunog nga gibanabanang midanyos og 34K. (via Dario Gil)

📷(Screenshot sa video ni Mayor Junard Ahong Chan)