“I will be issuing an executive order to declare Cebu under enhanced community quarantine or in other words lockdown,” sigon ni gobernador Garcia atol sa press conference sa Kapitolyo karong adlawa, Miyerkules.
Wala pa hinoon maklaro kon unsang adlawa mahimong epektibo ang lockdown tungod kay kinahanglan pa tigumon sa gobernador ang mga Mayor sa 44 ka lungsod ug 6 ka component cities sa tibuok lalawigan ugma, Huwebes.
Apil nga makig-alayon sa Probinsya sa Sugbo ang mga highly urbanized cities- Dakbayan sa LapuLapu, Dakbayan sa Mandaue ug Dakbayan sa Sugbo.
“Now more than ever that we need to join hands..Think, decide, and act as one Cebu,” matod ni Garcia.
Kon lockdown, pasabot niini, walay tugotan nga mogawas, gawas lang sa mga tawo nga gitawag nga “authorized person outside residence” .
Ugmang adlawa adunay tigom ang Gobernador uban ang mga Mayor sa tanang lungsod ug dakbayan sulod sa lalawigan sa Sugbo aron mahan-ay ang lakang aron dili magkagubot ang pagpatuman sa lockdown.
Matod sa gobernador daghan ang mga factors nga andamon sa pagpaubos sa lockdown sa tibook lalawigan.
Apil na niini ang pag-identify sa mga exempted o kadtong tugtan nga moadto sa trabaho sama sa mga medical personnel, paghimo og quarantine pass sa mga LGUs, supply sa pagkaon ug basic necessities, transportasyon ug uban pa.
Ang military ug kapolisan motabang usab sa Probinsya sa hugot nga pagpatuman sa lockdwon.
“And as always, I will be counting on the support of our PNP and military, to see to it that this lockdown will be strictly enforced,” matod ni Garcia.
Si Police Regional Office (PRO-7) Regional Director Albert Ignatius Ferro nagkanayon nga mopatuman og “maximum tolerance” ang kapolisan sa ilang pagbantay sa kadalanan sa pagpatuman sa maong lockdwon.
Aron nga mahatod ang mga Sugboanon nga moapas pagpauli sa ilang mga lungsod sa wala pa ang lockdown, si Garcia niawhag sa mga bus companies nga ideploy ang tanan nilang mga bus aron makauli ang mga Sugboanon
Si Garcia niawhag usab sa hunta probinsyal nga mopahigayon og emergency session ugmang adlawa, Huwebes, alang sa pagdeklarar nga ipaubos sa state of emergency ang tibook lalawigan tungod sa COVID-19.
Sa Marso 27, dili na modawat pa ang Sugbo og mga pasahero gikan sa gawas sa nasod.
“Effective 12:01 of March 27, we will no longer be accepting any passengers arriving from any international flights. Dili na kita modawat og bisag kansang pasahero nga nag gikan ug sa nagkadaiyang nasod nga mosulod diri sa Sugbo,” dugang ni Garcia.
Matod ni Garcia, bisan pa niadtong Marso 22 wala na’y mga langyaw nga gipasulod sa Probinsiya apan ubay-ubay usab nga mga Overseas Filipino Workers (OFWs) ang nipauli sa Pilipinas ug niagi sa Mactan Cebu International Airport (MCIA) —- dili lang mga Sugboanon apil na ang mga OFWs gikan sa ubang Probinsya.
