Si Mark Johnuel Duavis, 31, taga barangay Cangawa, Buenavista Bohol, ug usa ka government scholar sa University of Cebu College of Medicine Foundation Inc sa Mandaue City, niingon nga usa gyud sa nakaaghat niya ngamag-doctor mao ang mga kabus sa ilang komunidad nga nanginahabglan og tabang.
Sa nigawas nga October 2022 Physician Licensure Examination kaganihang kaadlawon, si Duavis nahimutang sa 10th place pinaagi sa rating nga 87.08 percent.
Isip usa ka public nurse ang iyang inahan, matod ni Duavis, nadak-an niya ang daghang mga tawo nga moadto sa ila kay magpatabang sa ilang mga sakit.
Human sa iyang pagtapos sa nursing school, mitrabaho usa siya isip nurse ubos sa Department of Health tungod kay way kapasidad iyang pamilya pagpatungha niya sa medical school. Nagtungha pa sab ang 2 niya ka manghod.
Sige siya og apply og scholarship program matag tuig, hangtod nga human sa 6 ka tuig nga pagpaabot, nadawat siya isip government scholar sa DOH ubos sa programa nga mao kanhi ang Pinoy Medical Scholarship program diin kinahanglan siyang mosilbi sa public hospital or rural health unit isip doctor to the barrio sulod sa di moubos 3 ka tuig.
Ang maong scholarship dunay 40 percent counterpart sa UC. 60 percent ra ang sa gobiyerno.
Matod ni Duavis sa dYLA interview, andam kaayo siya mahimong doctor to the Barrio.
“I am very much willing and I’m open to…kanang… helping other people. Akong isukli, ihatag nako ang unsay gihatag ninyo sa akoa kay di man gyud ni nako makab-ot kon wala ang tabang sa mga katawhan kay pinaagi sa inyong tax mao man nag sustento sa akua for 5 years nako pag-eskwela sa medisina. It is just proper nga isukli nako sa ilaha kon unsa ang gihatag nako,”matod ni Duavis sa DYLA interview.
Si Duavis hapit di katuo nga apil sa mi-top tungod sa kalisod sa exam apan giangkon niya nga iya kining gi pangandoy labi.pa nga sa nursing board, kuwang lang gyud og .6 percent aron siya makasulod sa top ten.
Mitapos si Duavis sa nursing course sa University of Bohol sa Tagbilaran City. Ang iyang grado kuwang sab og gamay para ma cum laude mao nga naninguha siya sa med school diin siya cum laude ug class valedictorian sa UC College of Medicine Foundation.
Si Duavis migraduate sab nga valedictorian sa Cangawa Elementary school ug Cangawa National High School sa Buenavista BOHOL.
Kamagwangan sa tulo ma igsuon. Iyang 2 ka mga manghod – usa psychologist ug ikaduha nurse.
Iyang amahan mao si Noel Duavis nga karon school principal sa Inabanga North Central Elementary school. Iyang inahan si Marilu Matabilas-Duavis kinsa lumad sa San Roque, Maribojoc Bohol, maoy public school nurse alang sa Buenavista ug Inabanga.
📷Mark Johnuel Duavis fb
